ORANJESTAD (AAN): E siman aki a anuncia oficialmente, cu Aruba Growth Fund a tuma un parti den e capital di Royal Aruba Aloe,
e industria mas bieu di Aruba. E inversion aki ta representa un paso importante pa avansa e capacidad nan di Royal Aruba Aloe pa produci producto di calidad halto, mientras ta promove pratica sostenibel di agricultura.
Cu un herencia distingui di excelencia, Royal Aruba Aloe ta domina completo e proseso di cultiva y produccion di e mata di aloe nativo di Aruba. E compania ta ofrece un gran variedad di producto pa cuido di cuero, cabey y solo, operando un negoshi di benta na cantidad (wholesale) y unico localmente. Ademas, Royal Aruba Aloe tin un presencia fuerte internacionalmente, exportando su producto nan pa Estados Unidos, Europa y mas, yegando mas di 65 pais den mundo.
Aruba Growth Fund a wordo estableci como un fondo cu ta inverti den negoshi nan local y ta respalda pa varios fondo di pensioen Arubano, representando mas di 20.000 miembro local. Su mision ta pa stimula desaroyo economico, sostene empresario y impulsa innovacion den e sectornan clave di Aruba.
E colaboracion aki ta un union natural. Combinando e experiencia y alcance global di Royal Aruba Aloe cu e recurso financiero y e orientacion estrategico di Aruba Growth Fund, nos ta bon posiciona pa fortalece nos capacidad operativo, amplia nos mercado y crea oportunidad di trabou pa nos comunidad local.
Hunto, nan lo traha pa mehora e proceso di produccion, duna poder na agricultura local y genera un crecimiento economico sostenibel pa Aruba. Nan ta spera cu e colaboracion aki lo tin un impacto positivo riba Royal Aruba Aloe, comunidad y e medio ambiente.
