Husticia lo benta e 2 Polisnan dilanti Corte
- El a ricibi solamente 1 impacto di bala y esey tabata mortal
- Instituto NFI na Hulanda ta yudando den investigacion
ORANJESTAD (AAN): Un total di 20 tiro ta loke e Polis a los e marduga di 9 di Februari 2025 na Madiki Kavel, cu a cobra bida di e hoben special Ayden C. Lanoy di 19 aña di edad. Den e tiramento aki na final di un persecusion relativamente slow, e hoben a perde su bida. Ora cu algun video a cuminza aparece, y cu publico a mira cu e “prome informe” di Polis no ta cuadrando, mesora comunidad di Aruba a cuminza halsa nan voz. Famia tambe corectamente a cuminsa cuestiona e incidente aki, y mesora nan a cuminza expresa cu Polis a simplemente asesina e hoben.
Riba Diabierna, Ministerio Publico di Aruba a duna un update completamente nobo riba e caso aki, y a bin dilanti e.o. cu envez di e 18 tironan cu a ser raporta anteriormente, awor a bin haya sa cu ta total di 20 shots a ser gelos, di cual ta uno so a dal e hoben. Aki bo ta mira cu e Polis aki mes no por ni kizas tira drechi cu su arma.
Tambe Ministerio Publico a indica cu nan ta bay hiba ambos Polis dilanti Corte di Husticia pa nan para responsabel pa nan acto.
Investigacion di caso: Segun Ministerio Publico, for di Februari te cu awor, nan a publica dos relato di prensa tocante e incidente lamentabel aki.
Na interes di e investigacion, e unico cu por a bisa e tempo ey tabata cu ambos agente policial envolvi den e incidente di tiramento, ta wordo considera como sospechoso.
Mientrastanto e avancenan den e investigacion ta haci posibel cu Ministerio Publico por duna mas transparencia. A scucha testigonan. A analisa imagennan y tambe a scucha e sospechosonan (e agentenan policial) varios biaha.
Ademas ta haciendo investigacion tecnico. Debi na e complehidad di e investigacion tecnico a pidi NFI (Nederlands Forensisch Instituut, Instituto Forensico di Hulanda) pa realis’e. E evidencia cu mester wordo investiga a wordo traslada mientrastanto pa Hulanda y poni den man di NFI.
E investigacion tecnico a mustra te awor cu a los binti tiro, di cualnan un a alcansa e victima y a resulta inmediatamente mortal. Considerando e resultadonan inicial di e investigacion tecnico y e interogacionnan adicional di e sospechosonan, Ministerio Publico a dicidi pa persigui e dos agentenan policial.
E dos agentenan policial lo wordo cita pa responsabilisa nan mes dilanti hues. Nan lo wordo acusa primariamente di ta complice di homicidio.
Prome cu Ministerio Publico a saca e publicacion aki, e contenido di e comunicado di prensa aki a wordo comparti cu famia di e fayecido y cu abogadonan di e sospechosonan.
Riba Diabierna ora cu Ministerio Publico a emiti e boletin nobo aki, por a tende hopi ciudadano grita di alegria “Porfin” y tambe “Husticia pa Ayden”. Tur cos ta mustra cu Huez lo bay ta esun final pa tuma decision si acaso lo tin castigo of no pa e agentenan.
