Caos ta confirma alerta DIARIO y barco di Chevron a pega na Venezuela
- 100 Euro pa 204.46 Florin Arubano y 100 Dollar pa 180 Florin
- Segun experto mundial: “Inseguridad ta unico seguridad awe”
ORANJESTAD (AAN) Mientras interes mas grandi na Aruba a keda concentra riba situacionnan local, DIARIO a bati alarma grandi pa loke tabata y ta pasa na mundo y ta deshaci di tur confianza cu mundo lo conoce un Semana Santa di trankilidad.
Informacionnan cada rato mas alarmante, tabata bati alarma na un mundo, caminda un expertonan mundial a papia di situacionnan cu pa hopi tempo mundo no a conoce y den cual manera nan mes ta conclui: “Inseguridad a bira e unico seguridad”.
DIARIO cu tur motibo a bati alarma na Aruba den un situacion special ya cu e Florin Arubano ta mara na Dollar Mericano mientras Aruba ta depende di Reino Hulandes cu ta depende di Euro, cu ayera a haya mas balor.
E taza di cambio di placa manera presenta pa Banco Central di Aruba, ayera a conclui e loke henter siman DIARIO a presenta cu ta e balor di Euro cu awor a alcansa un taza di cambio di 100 Euro pa 204.46 Florin Arubano.
Aruba mara na Dollar, ayera a mira su anotacion di taza di cambio di 1 Florin Arubano contra 0.554 Dollar Mericano.
Den moneda sigur e situacion mundial ta haya expresion pero e impacto cu e tin pa mundo ta bini dilanti den declaracionnan di expertonan mundial, cu ta man na cabez.
Dollar a baha realmente na un balor di tres aña pasa pa e Europeo y su Euro y ta causa consternacion den rangonan di mas halto te e publico normal cu a cuminsa reacciona.
For di momento cu Presidente Mericano, Donald Trump, a duna contenido na su amenaza na bini cu medidanan contra importacion pa proteha e productonan Mericano, mundo tabata en espera di e resultado pero awor ta comprende e impacto total.
Prijs di petroleo a aumenta un creinchi pero no a alcansa te na ciere di e edicion, un aumento cu lo a cambia e situacion actual.
Te na momento di preparacion di e articulo aki, crudo Mericano tabata 61.53 Dollar pa baril, mientras cu crudo Brent di Europa a keda na 64.72.
Den esaki no ta bini mucho dilanti kico ta pasa cu paisnan di OPEC cu Dialuna a baha nan producto te alrededor di 66 Dollar pa baril.
Uno di e miembronan di OPEC, sigur ta interesante pa Aruba ya cu ta trata di Venezuela, cu ta atende un asunto grave mas cu Merca, cu ta Chevron.
Despues cu Merca a dicidi cu Chevron no por sigui produci e Moypones cu e ta produci pa Nicolas Maduro, ta Nicolas Maduro cu a dicidi cu Chevron mester bandona Venezuela cu awor ta busca partnernan nobo pa su economia.
“Turbulencia” a bira uno di e palabranan mas uza pa expertonan internacional, cu a admiti cu nan no tabata prepara pa e situacion actual cu tin impacto enorme na mundo.
DIARIO a trata na haya informacionnan concreto pa Aruba, cu ta depende di un banda di Merca, cu manera DIARIO a indica ayera mester produci turista pa sigui alimenta economia di Aruba hasta den loke antes tabata wordo considera off season despues di Pasco Grandi.
Expertonan ta coincidi cu na e momentonan aki mester spera riba resultadonan di desaroyonan rond mundo, cu ta un caos cu mundo for di momento cu Covid-19 a sorprende, no a mira.
Mundo a cuminsa papia di mas leu cu un crisis di hasta un recesion pa e situacion actual. Semper tabata asina cu ora mundo haya su mes na careda, ta tene na e Dollar Mericano, cu awor a bira e centro di problema/
Mas ainda pues na momento cu bolsanan di balor ta cay hunto cu Dollar y prijs di petroleo no por recupera completamente den un mundo, di tension y mas tension.
Durante e weekend cu a cuminsa, mundo ta cuminsa cu observacion di Semana Santa, cu antes tabata final di e temporada halto di turismo y economia di Aruba.
Aruba ta mara na Dollar Mericano. Aruba ta depende di asistencia di Hulanda, cu ta mara na Euro pero tambe ta mara na un situacion mundial sumamente dificil.
Petroleo ta demostra su poder na mundo, cu durante fin di siman lo sigui reuni den cantidad di reunion, decisivo pa economia mundial, marca cu peso enorme di conflictonan di paisnan contra paisnan pero tambe di naturaleza contra hende, cu ta produci gastonan enorme pa un mundo insigur!
