Confianza di negoshi a keda optimista den di cuater trimester di 2021

Resultado di Survey haci pa Banco Central

ORANJESTAD (AAN): Banco Central di Aruba (BCA) a conclui e encuesta di percepcion di negoshi pa e di cuater trimester di 2021. E encuesta di percepcion di negoshi ta evalua e percepcion economico di e negoshinan local, como tambe e impacto causa pa e pandemia di COVID-19 riba nan actividadnan di negoshi.

Durante e di cuater trimester di 2021, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plazo, a baha cu 0,3 punto di indice te na 106,5 cual ta refleha un caida marginal den confianza di negoshinan, aunke ainda optimista (Grafico 1). E bahada den e percepcion di negoshinan ta debi na reduccion den tanto condicionnan economico actual y a corto plazo.

   E indice di condicionnan economico actual a baha cu 0,3 punto di indice te na 105,9 compara cu 106,2 den e di tercer trimester di 2021. E indice di condicionnan economico a corto plaso a registra un caida di 0,2 punto di indice, esta for di 107,5 den e di tercer trimester di 2021 te na 107,3 den e di cuater trimester di 2021 (Grafico 2). E porcentahe di encuestadornan cu ta premira un crecimento economico positivo den e siguiente 12 lunanan, a nota un bahada, esta di 5,3 punto di indice te na 43,9 porciento. Mientrastanto, e expectativanan di un crecimento economico flat den e siguiente 12 lunanan a crece cu 11,2 punto di indice, esta for di 34,4 porcentahe den e di tercer trimester te na 45,6 porciento.

Pa locual ta e impacto causa door di e pandemia di COVID-19, BCA a amplia e encuesta di percepcion di negoshi, pa asina tambe evalua e percepcion riba su impacto ariba benta di negoshinan y e necesidad pa aplica pa fondonan di emergencia den e di cuater trimester di 2021.

Pa dos trimester consecutivo, aproximadamente 28 porciento di e negoshinan encuesta (27,9 porciento) a indica cu e pandemia di COVID-19 a sigui tin un impacto significante riba e benta di nan negoshi.

E informe completo di e encuesta di percepcion di negoshi ta disponibel riba website di Banco Central na cbaruba.org