Banco Central a registra optimismo cerca negoshinan pa futuro --- *266 Miyon mester bay na pago di interes riba debe di e pais --- *Awe Aruba ta haya prueba di loke debe nacional ta pa e pais
ORANJESTAD (AAN) — Cifra ta e unico forma pa splica comunidad kico a pasa cu su placa y pakico tin leynan cu ta dicidi con gobernantenan mester atende cu placa di Pueblo.
Durante e siman cu a pasa, Ministro di Asuntonan Financiero, mr. Xiomara Maduro, a entrega Parlamento di Aruba e placa cu Aruba a calcula cu e lo ricibi na entrada y e gastonan cu e pais mester haci na 2022.
Proximamente Parlamento di Aruba mester reuni y duna su aprobacion na e Presupuesto pa asina dicidi cuanto placa Gobierno por gasta of no gasta durante 2022.
Reino Hulandes a bay di acuerdo pa Aruba por tin un calculacion di cifra den cual e entradanan no ta igual cu e gastonan. Aruba lo mester pidi na prome lugar asistencia Hulandes pa cubri e suma cu Aruba no tin pa cubri tur e gastonan cu a wordo calcula.
Reino Hulandes pues a haci un excepcion debi na e situacion mundial actual cu Covid-19 a ocasiona y cu a stroba cu e cifranan cu Ministro Maduro a prepara pa 2020 y cu tabata tin un saldo positivo pa Aruba, no a bira realidad.
E pandemia di Covid-19 a dal Aruba, cu no tabata tin ningun reserva pa a enfrenta futuro cu a exigi gastonan inespera na 2020.
Es mas, na momento cu Covid-19 a pusha Aruba den e muraya pa bay busca mas prestamo, Aruba tabata carga cu un debe nacional, cu awe ta pone nos realisa pakico tin un ley cu ta exigi gobernantenan gasta placa di Pueblo na forma responsabel.
Aruba mester paga un interes di 266 Miyon riba prestamonan cu e pais a haci.
Pa realisa kico esaki ta nifica, mester mira e haltura di e buraco cu Aruba tin entre su entradanan y su gastonan, cu ta 291 Miyon Florin.
Por conclui pues cu e falta di placa pa cubri gasto cu entrada, ta casi mes halto cu e placa cu Aruba mester paga riba interes pa debenan cu e pais tin.
Sin duda, e trabou di maneho financiero di Aruba na e momentonan aki no ta uno facil.
Gabinete Evelyn Wever-Croes mester evita tur gasto cu no ta necesario pa asina Aruba evita un fayo mas grandi riba su presupuesto, cu ta indica cu Aruba no tin e placa cu e mester pa e pais wordo goberna.
Kico e resultado ta pa Pueblo di Aruba por nota den e hecho cu trahadornan mester scrap tur posibilidad pa nan progresa riba tereno financiero pero mas bien mester entrega, si no yega na un areglo cu Reino Hulandes.
Cifranan ta papia un palabra cla den e sistema di Aruba, cu tin ley cu ta dicidi con e maneho financiero di e pais mester ta y cu no ta permiti creacion di debe nacional ni pa paga awe ni den futuro.
Kico por a haci cu e placa cu Aruba mester paga na debe nacional y awor na debenan cu e pandemia a nifica?
Hopi, pero ya no por cambia loke a pasa ayera.
Mientrastanto e investigacion cu a haci cerca negoshinan durante e tercer trimester di 2021, a indica cu nan ta positivo enfrente futuro.
Un positivismo cu Aruba mester pa sigui cana den un mundo, cu awe ta entrega Reino y Aruba un preocupacion gubernamental nobo, cu ta e crisis di Ukraine.
