En conexion cu Dia Internacional di Hende Muhe
ORANJESTAD (AAN): En conexion cu Dia Internacional di Hende Muhe, Ministerio di Salubridad, Asunto Social, Cuido di Adulto Mayor y Maneho di Adiccion bou di liderazgo di Minister Melvin Wyatt-Ras a organisa recientemente e conferencia “Women in Transformation” cu e tema Grow, Heal, Lead (Crece, Sana y Lidera).
E conferencia a reuni diferente profesionalnan, expertonan y lidernan di comunidad pa reflexiona riba e proceso di transformacion cu hopi hende muhe ta pasa den nan bida personal y profesional.
Durante e conferencia, participantenan a sigui presentacionnan inspirativo di Dr. Clementia Eugene, investigadora y docente na Universidad di Aruba y Antoniette Geerman, psicologo GZ y fundadora di Psyched Aruba. Den nan presentacion, nan a comparti conocemento y hermentnan practico riba desaroyo personal, bienestar emocional y con hende muhe por fortalece nan resiliencia mientras nan ta maneha cambio y desafio den bida.
E conferencia tambe a inclui un panel di discusion cu a explora con hende muhe por crece, sana y guia den diferente rol den sociedad. E panel a wordo modera pa Dahariana Evertsz y a inclui e siguiente panelistanan: Ali Hector, stilista professional di vestuario; Drs. Nathalie Kingsale, psikiatra na Respaldo Aruba; Deborah Alexander, empresario y docente na Universidad di Aruba; y Esther Offringa, mentor y mama di atleta mundial Sara Quita Offringa.
Durante su discurso di apertura, Minister Wyatt-Ras a enfatisa cu transformacion ta un proseso continuo den bida y cu ora hende muhe tin oportunidad pa crece, sana y lidera, e impacto ta yega mas leu cu solamente un persona y ta beneficia famia, comunidad y sociedad en general.
E conferencia a crea un espacio pa dialogo, inspiracion y conexion entre participante nan, reafirmando e importancia di inverti den bienestar, desaroyo personal y liderato di hende muhe den nos comunidad.
{gallery}Conferencia Women in Transformation a inspira dialogo riba crecemento, sanacion y liderazgo{/gallery}
