Conferencia “Quality of Healthcare” organiza pa IVA ta hopi importante

Minister di Salud Mervin Wyatt-Ras:

ORANJESTAD (AAN)-- Minister di Salud Publico, drs. Mervin Wyatt-Ras, a yama pabien na e Departamento di Inspeccion di Salud Publico, IVA, pa e “Quality of Healthcare Conferencia IVA 2026: Risky Business”, cu a tuma lugar Diabierna ultimo, na Aruba Marriott Resort & Stellaris Casino.

“Ta hopi importante cu ta pone atencion riba e trabao cu Inspeccion (IVA) ta haci. Inspeccion ta haci un trabao hopi importante pa garantiza e calidad di cuido na Aruba, y t’asina cu unda cu tin hende ta traha, semper tin cosnan ta sosode, foutnan ta wordo haci, pero ta hopi importante cu IVA ta tuma su tempo pa analiza esakinan; ta den combersacion y dialogo cu e profesionalnan na trabao y e ora ey yega na solucionnan, palabracionnan, den cooperacion cu otro. Esey ta hopi importante pa e trabao cu IVA ta desplega. Nos Ministerio ta apoya e trabao aki. Inspeccion di Salud Publico ta basa riba ley, y tambe nos ministerio ta haya esaki hopi importante su trabao. Nos a haci posibel cu IVA a ser amplia tambe, cu mas empleado, p’asina nan por atende tambe e asunto di nos adultonan mayor, pasobra den casnan di cuido tambe tin incidentenan ta tuma lugar, y e ora ey nan ta haci un assessment y na dado momento tambe nan por duna aanwijzen, pero tambe e guia na e personal pa haci e trabao na un miho manera. Kiermen, nos ta conta hopi cu IVA su aporte pa comunidad”, e dignatario a expresa.

Pa Minister Wyatt-Ras e dia aki di e conferencia tabata uno hopi special, pasobra IVA no ta para keto. Esaki tabata e di tres edicion di e conferencia y ta desea pa nan sigui traha asina aki.

“Naturalmente, den pueblo bo ta tende aki, aya critica, pero e criticanan aki mester yega na e lugar corecto y no solamente den social media of otro caminda. Deposit’e tambe na e Instancia cu por haci algo cu ne, cu por investiga y tambe yega na un miho acogida, un miho cuido, pa e ciudadanonan den nos comunidad, pasobra nos ta garantiza un cuido transparente, di calidad, basa tambe riba regla, normanan y tambe riba Ley”, Minister Wyatt-Ras a remarca.