Ariana Koolman-Chirino a presenta na Biblioteca Nacional su buki “Mi baul di poema”

ORANJESTAD (AAN) – Diamars 26 di April aki, na Biblioteca Nacional, a tuma lugar e presentacion di e buki di Ariana Koolman- Chirino “Mi baul de poema”.

Den entrevista cu DIARIO, e Autor a duna di conoce cu “Mi baul di poema” ta un buki inspira den tur hende cu ta rond di dje, cu a encurash e pa e publica su poemanan.

El a menciona cu e tin hopi tempo ta skirbi, pero nunca el a saca nada den publicidad te awor. El a participa cu e poemanan cu ta awo den e buki, atravez di Poeta di Patria, y otro proyectonan.

Pero awo loke e publico ta pidi ta wak ki dia e buki ta sali. Aworaki esey ta un realidad. E ta contento di tin señora Olga Buckley y señor Richard Damian, cu ta su amigonan di semper como Madrina y Padrino di e presentacion di e buki.

E dama a gradici tur persona cu a sponsor cu a contribui na e presentacion di su buki “Mi baul di poema”, pasobra nan a mira e calidad di loke ta wordo presenta y a tuma e reto di aporta na dje.