Situacion mundial ta expone e liderazgo di Evelyn Wever-Croes
*Rusia a deshaci di su posibilidad di reclama yabinan di Citgo
*Futuro di combustibel central den confusion internacional total
ORANJESTAD(AAN)—Na 2017, ora Aruba den un situacion financiero cu segun Hulanda mester considera bancarota, a dicidi pa cambio politico historico, hamas Aruba por a mira kico tabata sconde den futuro y lo bira encargo di e lider politico nobo di Aruba.
2017 lo drenta historia no solamente pa e buenta politico grandi na Aruba, pero sigur como antesala di situacionnan mundial, cu hamas Aruba por a soña cu lo azota mundo.
Na 2017, Aruba tabata economicamente den man di uno di e desaroyonan politico mas importante den e relacionnan entre Venezuela y Merca, cu tabata e dos paisnan cu tabata tin futuro economico di Aruba den nan man.
Un futuro economico sumamente decisivo den e situacion financiero cu Aruba tabata y cu tabata haci cu Arubianonan tabata crea debe pa nan mes en espera di e futuro di petroleo di Nicolas Maduro, cu a pensa cu e por a crea un asilo politico pa su grupo, na Aruba, cu tabata economicamente den su man.
Cuanto cos a pasa for di e momento cu Evelyn Wever-Croes a presta huramento como Prome Ministro di Aruba, cu na inicio di 2018 mester a tuma medidanan pisa den un mundo den problemanan creciente?
E dictadura di Nicolas Maduro den porta di Aruba y peor ainda cu yabi di refineria y economia di Aruba den su man.
Mientras ya Hulanda a cuminsa sincronisa placa di Aruba, como Prome Ministro Evelyn Wever-Croes mester a realiza e hazaña politico historico pa kibra e acuerdo pa reapertura cu e restonan mortal di Lago, cu Mike Eman a entrega na Nicolas Maduro.
Un cambio grandi a bini den direccion di maneho di Aruba, cu por a aprecia con pa prome bez den hopi tempo, Prome Ministro Evelyn Wever-Croes y Ministro di Asuntonan financiero Xiomara Maduro, a entrega un presupuesto cu un saldo favorabel na Aruba, cu algun luna despues mester a cera porta di su economia ora Covid-19 a bati na porta.
E plannan di Gobierno Wever-Croes no a wordo destrui. E plan di un maneho total den cual no solamente medida financiero pero tambe reconstruccion economico tabata central, a haya continuacion y a resulta den atraccion di e proyecto Eagle, cu mester bira centro di gas na Aruba.
Vision ta bini dilanti den e forma cu Gobierno Wever-Croes a pone fin na e epoca di refineria y a bay pa e proyecto Eagle, cu ta wordo ehecuta actualmente mientras cu Aruba ta traha riba e proyecto di hydrogeno, cu ta wordo considera e combustibel di futuro.
Mientras un Gabinete Wever-Croes a sigui otro, problemanan mundial a sigui otro.
Actualmente Aruba ta parti di un mundo cu ta papia di Tercer Guera Mundial, miho bisa e culminacion di Guera Mundial oficialmente, pasobra na e momentonan aki, henter mundo ta na guera y den un confusion total.
Citgo a keda Merca pero lo wordo bendi na Januari 2024 si tur plan sigui. Rusia segun informacion a deshaci di su reclamo riba casi mitar di e refineria cu ta den man di oposicion, mientras Nicolas Maduro ta exigi placa di Citgo for di Merca, pais cu cual el a declara guera.
Kico lo pasa na mundo? Ni dirigentenan grandi mes no ta parce di ta na haltura. Reino Hulandes tambe ta na careda den un situacion di eleccion cu por trece cambio grandi riba tur tereno.
E Ministro Hulandes encarga cu Relacionnan den Reino practicamente no ta conoci na Aruba, cu a wordo introduci na Alexandra van Huffelen di partido D’66, cu ta practicamente na caminda pa museo politico di Hulanda si tene cuenta cu e cantidad di voto cu el a perde.
Un pregunta grandi ta keda na Aruba. Con ta bay enfrenta e situacion mundial, cu ta parce di aumenta hasta prijs di e pan cu nos ta come atrobe?
Na e momentonan aki e figura di lider ta central. E maneho cu a wordo hiba dor di e Gobierno dirigi pa Evelyn Wever-Croes, a entrega Aruba un base cu hasta ta inclui un centro di combustibel moderno, cu lo reemplasa gas, cu lo reemplasa petroleo na Aruba como centro di e operacionnan di Eagle.
Aruba ta na final di 2024 como parti di un mundo den confusion total. E peso di momento ta wordo reduci dor di e medidanan cu a wordo tuma y a entrega na Aruba e imagen di un pais responsabel, un pais cu proyectonan solido den e futuro den cual lo mester despedi di e Era di Petroleo, cu pa Aruba ya ta un capitulo cu den planificacion, a wordo cera.
