Surella Croeze, Beleidsmedewerker di DMH:
ORANJESTAD (AAN) – Surella Croeze, Beleidsmedeweker na Departamento di Mucha y Hoben (DMH), a subraya den entrevista cu DIARIO, cu seguridad ta hopi importante pa e mucha cu ta bay un centro di cuido.
El a expresa cu hopi biaha por scucha “ah, pero nada ta pasa” y ta warda te ora algo sosode pa core busca solucion. “Mi ta kere cu nos mester traha preventivo, y nos ta e unico Isla den e region aki, cu e ley no tabata na su lugar, te aworaki nos a logra. Pues, tiki tiki cu nos tin cu traha riba esey y ta pa e bienestar di e muchanan e calidad di e centro, e calidad di loke ta wordo brinda”, Croeze a subraya.
Esaki pasobra antes e mucha tabata bay na e centro, nan ta wak’e y atardi e mayornan tabata bin busk’e. “Pero un centro ta mucho mas cu esey. Awo nos ta papia di e area di desaroyo di e mucha. E mucha mester caba cierto punto na e centro pa e por sigui den kleuter. Kizas e no ta bay yega tur, pero nos tin un bista, un direccion, unda e mucha ta suppose di cana, te ora e ta sigui den su kleuter y den su comunicacion”, Surella a señala.
El a agrega cu ainda no tin algo delinea ainda pa ora e mucha drenta Kleuter, pero DMH ta trahando riba dje, via un sistema di intervencion trempan via e centro di cuido di mucha.
“Nos tin di purba señala na unda e mucha ta den su desaroyo, si nos por yud’e tambe den e centro, y si nos por yuda te na unda pa nos haci un traspaso tambe na e kleuter. Berdad tin centronan ta haci’e extremadamente bon, pero nos tin ora cu e kleuternan ta indica cu e centronan ta haci net loke cu nan ta suppose di haci. Pues cada ken mester sa e expectativa di otro y te na unda nan ta yega den nan trabao”, Surella Croeze a señala.
