Citizens Insurance ta lansa un Health App pa nan cliente di seguro medico 

ORANJESTAD (AAN):  Clientenan cu ta titular di un seguro medico cerca Citizens Insurance lo haya un manera conveniente y inovativo pa administra nan seguro medico y tambe declara claims den caso di malesa.

            E Citizens Health App lo ta disponibel pa download via Google Play y Apple store pa tur persona cu tin un seguro medico na Citizens Insurance. E app lo tin algun caracteristica conveniente pa su clientenan, manera acceso na tur detaye di e cobertura medico pa e titular di e polisa, pero tambe su dokter, dentista, of hospital por haya acceso na e informacion di un manera facil y conveniente.

            E app tambe lo duna e usuario e opcion pa den un instante por presenta un claim dor di manda un potret, administra nan informacion personal of di nan familiar of dependiente, y tuma contacto cu Citizens Insurance via WhasApp, E-mail, y sigur tambe via telefon.

            E Health App a ser desaroya dor di Citizens Insurance despues cu a haya feedback di clientenan cu tin necesidad pa un manera mas conveniente pa haci transaccion relata na nan seguro medico.

            Ta importante pa duna nan cliente mas opcion pa por haci comercio cu menos interaccion fisico. E Citizens Health App tambe lo mehora e eficiencia di organisacionnan pa cu plan di seguro medico pa nan empleadonan.

            SETAR NV, cliente di Citizens Insurance, a tuma e oportunidad pa reuni cu e ehecutivonan di Citizens Insurance pa introduci e Citizens Health App cu tur su caracteristicanan.

            “E citizens Health App ta un herment inovativo cu ta  cai bou di nos vision pa bira e compania cu ta proporciona tur necesidad di seguro di e manera mas simpel y conveniente. Awo cu salud ta na prome lugar den mente di tur hende rond di mundo, Citizens kier ofrece un servicio  cu ta confiabel, simple, y  na alcanse di tur cliente cu ta rekeri di cobertura, Angeline Tromp, Directora di Citizens Insurance a menciona.