ORANJESTAD (AAN) – Enberdad den nos comunidad, no di awo, pero for di hopi tempo caba, tin un anhelo grandi cu Caya Grandi bolbe
na su origen, sinembargo tin diferente factor cu ta stroba Caya Grandi pa bolbe bira popular, y no ta mira e voluntad pa trece cambionan positivo y necesario.
E articulo aki ta basa riba diferente opinion cu a drenta na nos mesa di redaccion, tocante e prome pregunta cu cual e prome “debate politico” a cuminza, siman pasa.
Na prome lugar, e ciudadanonan ta haya cu pa drecha Caya Grandi e doñonan di e tiendanan ta esnan cu mester cuminza pa renova nan edificionan, cu mayoria ta hopi mahos caba.
Nan ta e prome yama na haci inversion, y tambe actualiza nan mercancia. Tanten cu na Caya Grandi no tin nada nobo pa ofrece, e consumidornan ta prefera pa bay direccion di Noord, unda tin un tienda tin tur cos, na bon prijs y ademas un bon stacionamento y sin molester di drogadictonan ambulante.
Na Caya Grandi tin dos problema “grandi”: un rij di tienda cu ta bende exactamente e mesun producto. No tin variacion, kizas un tiki mas barata cu otro, pero tur paña, zapato, cartera, accesorio, etc., ta mes cos, aparentemente tur ta treci di zona franco di Panama. No tur Arubiano y sigur tampoco e turistanan ta esey nan kier wordo ofreci.
Tin hopi local cera aworaki. Si un hende kier bin cu algo nobo, un tienda cu mas variedad cu por capta e satisfaccion di diferente gusto di cliente, no por hacie den Caya pasobra e prijs di huur ta super eleva. Cierto doñonan di edificio ta prefera pa wak e lugar deteriora bay atras cu drech'e y huur’e pa prijsnan cu e comerciante por paga, incluyendo su trahadornan, coriente, airco, awa y kizas incluso internet. Pero esey ta djis un ilusion di hopi, no un realidad pa esnan interesa.
Actualmente, tampoco Caya Grandi ta ofrece mucho lugar pa drenta bebe un refresco, un coffie, y come algo. Antes tabata tin un lugar cu tabata bende ijscream masha sabroso mes, pero despues cu el a cera ningun hende mas a tuma e lugar over pa ofrece un producto similar. Otro gran problema ta e stacionamento. No tin lugar pa laga un auto staciona sin e peligro cu hasta e por wordo horta. Tin demasiado drogadicto ambulante cu ta cana molestia peaton y comerciantenan tambe. Esaki tambe por ta un tarea di e comerciantenan mes pa paga security pa evita e molester di e personanan aki, cu cada dia ta mas y mas ta bin den ciudad.
Un consumidor a comenta cu recientemente a bay Caya Grandi pa cumpra un regalo pa un mucha cu a cumpli aña y den henter Caya no tabata tin nada drechi pa e cumpra. El a cana full Caya, y mester a give up, y busca pafo di ciudad un negoshi unda si por a haya algo bunita.
Semper pa Pasco ta gobierno ta esun cu ta inverti pa alegra e ambiente. Pero esey no mester ta un gasto di gobierno, esey tambe mester ta un iniciativa di e comerciantenan mes y no pa December so, pero durante henter e aña mes.
Y asina tin mas comentario den pueblo, cu ohala por wordo tuma na cuenta si enberdad kier rescata Caya Grandi y devolve su esencia.
