ORANJESTAD (AAN) — Manera DIARIO a yega di comenta recientemente, Nacionnan Uni (of United Nations) ta poniendo hopi enfoke
na locual tin di haber cu medio ambiente, salud, combatimento di pobreza, bon alimentacion pa un y tur, den e contexto di e agenda di e Desaroyo Sostenible 2020-2030.
Den e mesun rosea, Nacionnan Uni a proclama dia 7 di Juni, for di aña 2019, como “World Food Safety Day” of “Dia Mundial di e Seguridad Alimenticio”.
E tema pa aña 2021 ta “Cuminda sigur awe pa un mañan saludabel” (Safe Food Today for a Healthy Tomorrow).
E obhetivo di e observacion di e dia aki ta duna di conoce, detecta y preveni, e riesgonan cu e alimentonan por causa na salud di hende, si nan no ta wordo preserva, y genera accionnan pa contribui cu e seguridad alimenticio, economia, salud y desaroyo sostenible.
E dia aki a wordo proclama door di Nacionnan Uni na aña 2019, unda a designa “Food & Agriculture Organization” (FAO) of “Organizacion di Nacionnan Uni pa Alimentacion y Agricultura”, y e Organizacion Mundial di Salud (WHO) e tema concerni riba e seguridad alimenticio, na nivel mundial, cada aña.
E seguridad alimenticio ta encera garantiza e control preventivo di e alimentonan for di su produccion primario, incluyendo almacenamento, transportacion, comercializacion y distribucion, e cu su consumo final, cu e finalidad di evita e contaminacion y malesanan cu ta wordo transmiti door di ingestion di alimentonan den mal estado.
E ausencia di e standardnan aki por representa un peligro grave pa salud di hende, debi cu e alimentonan por ta contamina door di algun micro-organismo manera bacteria, virus, of agentenan kimico manera insecticida y pesticide, cu no por wordo detecta na simple bista.
Pa tal motibo ta fundamental pa adopta medidanan estricto y integral di control den e cadena alimenticio, locual ta un responsabilidad conhunto di Gobierno, Industria y Consumidornan, segun Nacionnan Uni ta anota.
RESPONSABILIDAD DI UN Y TUR:
Segun FAO, e seguridad alimenticio ta wordo defini como e acceso permanente y suficiente di alimento, cu ta satisface e rekerimentonan nutritivo y e preferencianan alimenticio di e personanan, contribuyendo na un bida activo y saludable y e ta relaciona cu e siguiente factornan:
Disponibilidad di suficiente alimento
Acceso oportuno na e alimentonan y su probechamento
Calidad di alimento, referi na su seguridad y grado nutritivo.
E produccion, comercializacion y elaboracion di alimento ta responsabilidad di tur esnan cu ta interveni direct of indirectamente den e proceso aki.
Pa e seguridad alimenticio ta un realidad y un exito global, ta rekeri di e cumplimento di reglanan stricto di control, referi na e saneamento di awa, seguridad den e planificacion di productonan agricola y mayor educacion pa e sector productor y consumidor, cu por garantiza e seguridad alimenticio, y contribui pa evita e propagacion di malesanan na nivel mundial.
