Companianan cu a haya subsidio di salario di mas, awo ta bay haya un cobranza

ORANJESTAD (AAN) – Minister di Finanzas, Economia y Cultura Xiomara Maduro, a splica den conferencia di prensa Diaranzon, cu Aruba ta cumpliendo cu e rekisitonan di control cu Gobierno di Hulanda

a stipula pa por otorga Aruba e siguiente tranche y e rapport di esaki ya a bay pa CAft, pa e duna conseho na Conseho di Minister di Reino.

E mandatario a bolbe splica cu no cumpli cu e condicionnan di control di subsidio di salario lo a pone e sosten di likidez na peligro.

“Si nos no lo haya e fianza di Hulanda, Gobierno lo no tin suficiente fondo pa por paga e subsidio di salario pero tambe otro gastonan manera di AZV, SVb, salario di empleado publico, etc., etc. Pues, tur pa locual Aruba ta pidiendo e fianzanan aki pa cubri e necesidad financiero”, e mandatario a subraya.

“Ta importante pa remarca cu Aruba ta recuperando, pero nos no a sali ainda di locual ta e pandemia aki, y gobierno na e momentonan aki sigur no por core e riesgo di keda sin cumpli cu e condicionnan y keda, e ora ey, sin haya e fianzanan aki for di Hulanda”, e mandatario a reitera.

Minister Maduro a señala cu si for di e controlnan ta resulta cu gobierno a duna e subsidio di salario cu no ta corecto, e ora ey e compania ta ricibi un cobranza. E dignatario a subraya cu ta mas cu claro cu ta importante pa acentua esaki.

E mandatario a bisa cu esnan cu no ta di acuerdo por haci obhecion y nan tin seis siman pa haci esaki, y tambe por yega na un areglo di pago suaviza pa tene cuenta cu e situacion financiero di e compania.

“Nos tur sa cu e subsidio di salario aki, ta algo hopi importante. El a yuda hopi compania desde Mei di aña pasa, pa asina por a enfrenta y tambe surpasa locual e crisis economico cu Covid-19 ta trece cune,  hopi empleado por a retene nan cupo di trabao, y parti di nan salario. E companianan tambe por a evita bay den kiebra door di haya e yudanza aki di gobierno.

Aña pasa a hinca mas di 400 miyon florin den comercio, pero tur locual nos ta haya na fianza ta cay tambe bao di control. E controlnan aki, aworaki ta manifesta nan mes, nan ta tumando lugar y cierto di nan ta resulta den cobranza, pero tin un areglo di pago pa por cumpli cune”, Minister Xiomara Maduro a reitera.