ORANJESTAD (AAN): Diamars a sosode un incidente hopi tristo ora cu un mucha homber di 11 aña a bira malo den avion durante un buelo for di Bogota pa Aruba.
DIARIO a ricibi hopi reaccion riba su Facebook Page di personanan cu a expresa palabranan di pesame y condolencia dirigi na e famia di Jaden Focke.
Jaden tabata un alumno di Scol Primario Kudawecha. Segun por a lesa den diferente publicacion, e tabata un mucha homber hopi keri cu tur mainta tabata yega scol tempran y saluda e maestronan. E tabata trata tur hende semper cu respet.
Esnan di Scol Primario Kudawecha a dedica e palabranan aki na Jaden: “Nos curason ta tristo y carga pasobra nos alumno y amiguito Jayden a bay laga nos.
Jayden, un alumno hopi alegre, presente y respetuoso. Nos lo haya su falta. Tur su bunita recuerdonan lo keda semper den nos curason .
Nos ta desea su mama, tata, stiefvader, rumannan y demas famia hopi forsa den e tempo dificil aki. Cu Jayden su alma sosega na paz”.
Famia, docentenan, conocinan, amistadnan a expresa nan duele pa cu e fayecimento di Jaden. E lo wordo crema den seno familiar dialuna 4 di Augustus.
Cu Jaden sosega na paz. Forsa na e famia den e temponan dificil aki.
