ORANJESTAD (AAN): Den cuadro di conmemoracion di Dia Internacional di e Pueblonan Indigena,
Fundacion Lanta Papiamento y Fundacion Rancho ta invita comunidad pa un charla educativo titula:
"Lenga Indigena – Tradicion y Supervivencia".
E charla lo tuma luga diasabra dia 9 di augustus 2025, for di 4:00 pa 6:00 di atardi den e sala principal di Biblioteca Nacional Aruba, situa na George Madurostraat 13.
E orador principal ta Ramon Todd Dandaré Mag. Ling. kende lo comparti su conocemento y reflexion riba e importancia di lenga indigena como medio di conservacion cultural, identidad di pueblo y resistencia historico.
E evento aki ta completamente gratis y ta habri pa tur esnan interesa den cultura, historia y promocion di e herencia linguistico den mundo.
Ta invita tur hende pa forma parti di e celebracion aki y duna sosten na preservacion di lenga y cultura indigena.
