Presidente di Fundacion Alzheimer Aruba ta boga pa reeduca comunidad:
ORANJESTAD (AAN): Melva Croes-Yanez, Presidente di Fundacion Alzheimer Aruba a duna di conoce cu den cuadoro di e celebracion di nan 20 aniversario ta organisando e simposio 'Cuido cu Dignidad' cual lo tuma lugar dia 23 di September proximo.
El a splica cu e aña aki lo enfatisa hopi riba e 'sindroma di atardecer' (sundowning syndroom). Na 1980 e parti aki a wordo conoci na mundo henter tocante e problema cu ta existi cu hendenan ta cana bay y perde.
Fundacion Alzheimer tabata envolvi den un caso dia 30 di November unda despues di un siman nan a wordo notifica cu e persona tabata perdi. Esey ta un periodo hopi laat, a remarca.
E parti di perdemento, cana bay, perde di un hende riba un isla chikito manera Aruba cu no por wordo haya ta algo di lamenta, a sigui bisa.
Un biaha aki a yega di organisa un training na Aruba pero esey tabata basta aña pasa. Hopi di e hendenan ey a bay cu pensioen y nan no tey mas, a bisa.
Segun Drs. Croes-Yanez, ta bay haya den prensa, cu den pasado hopi cos bon a pasa ora cu e training ey a bin, cu por a logra haya e persona perdi door di e tecnica cu nan a wordo siña durante e training menciona.
El a indica cu ta nan deseo di por duna e training aki tambe na esnan trahando den prensa. Tambe na hendenan di Brandweer, Cuerpo Policial. Rampenbestrijding, etc.
A enfatisa cu e personanan cu ta padece e sindroma aki tambe ta hende y pakico mester trata nan diferente pasobra cu nan tin un ke otro transtorno neuro-cognitivo of Alzheimer.
Mester educa comunidad un tiki mas miho pa no tin bruhacion riba e tereno aki. "Hopi hende ta kere cu pasobra bo ta lubida, bo tin Alzheimer. Mientras cu no ta necesariamente, hasta tin chansa ta wordo haci", a expresa.
Esaki ta cosnan cu mester bay reeduca comunidad cu tin mas transtornonan y cu no necesariamente ta Alzheimer. Awendia ta constata cu un persona cu a wordo diagnostica, di un dia pa otro, no ta sirbi mas y te hasta tin biaha ta wordo poni bao di curatela. Mientras cu e hende a keda e mesun hende cu bo a conoce ayera of antayera, a expresa.
Podise su malesa a pon'e cambia, pero no por ataca e persona en bes di e malesa. Pesey mester bin cu mas conscientisacion den comunidad, Croes-Yanez a finalisa bisando.
