Trahado Social di DAS Noemi Maduro:
*Tema: “Demencia- Alzheimer”
ORANJESTAD (AAN) — Den entrevista cu e Trahador Social di Departamento di Asunto Social (DAS), señora Noemi Maduro, el a elabora tocante e proyecto “Cana Hunto Cu Mi” , cu lo tuma lugar dia 23 di Februari (Diabierna di e siman aki) na MFA Paradera, di 6.30 pa 9.30 pm.
Noemi Maduro a expresa cu pa DAS ta un honor di trece e proyecto aki den e bario. El a comenta cu hopi hende ta puntra kico e nomber “Cana hunto cu mi”, kiermen.
“Cana hunto cu mi, kiermen cu e famia ta cana hunto cu nos, como Trahado Social y otro profesionalnan, y nos ta bay hunto un atardi, un anochi ameno, dunando informacion riba e tematica cu ta biba den nos comunidad, actualmente, cu ta ‘Demencia-Alzheimer’. E no ta bay ta un anochi informativo di solamente kico ta Demencia-Alzheimer, pero lo duna tips concreto, entre otro, pa e ‘caregiver’. Pero kico pa e dunador di cuido informal, cu ta e ‘caregiver?’ E ta un tematica alarmante den nos comunidad”, Noemi Maduro a señala.
El a agrega cu esaki ta un tematica cu DAS ta hayando dia pa dia den tur distrito. Hendenan ta bin pa hinca nan grandi den Cas di Grandi. “Pero, nos a scucha e grandi? Nos a scucha e famia? Nos ta purba di yega na un solucion a medio, corto of largo plazo”, Noemi Maduro a indica.
Noemi a menciona cu e grupo mas preocupante ta e grupo 60 plus, cu ta e personanan cu tin un Demencia-Alzheimer, aunke tin hende di menos edad cu tambe ta hay’e.
“Psicologo di Centro di Memoria ta un di e personanan cu lo tey pa duna informacion, pero pa un edad mas hoben, cu ta 50 plus, cu ya caba tin e demencia-Alzheimer. No ta solamente e demencia ta e problema pero kico e ta trece cu ne cu e grandi ta perde su memoria na un edad hopi jong, y e famia e ora? Anto nos tey pa scucha e famianan”, Maduro a menciona.
