Compania HVC ta dispuesto di explora posibilidad di comparti su experiencia tecnico cu Aruba

Empresa Hulandes cu 35 aña di experencia

• Ta combina procesamento di sushi cu produccion di energia y reciclahe 

ORANJESTAD (AAN): E empresa Empresa Hulandes HVC, cu ta specialisa den maneho di sushi y energia sostenibel, ta dispuesto di explora si su experencia y modelo di cooperacion por contribui na haya solucion pa e problematica di sushi na Aruba, Corsou y Boneiro. Esaki a sali dilanti durante un bishita di Prome Minister Mike Eman y su delegacion na e instalacionnan di HVC na Alkmaar.

   Douwe van der Vaart, Strategisch Relatiemanager di HVC, a splica cu e empresa a cuminsa na 1991 y cu e a cumpli 35 aña di existencia e aña aki. Su desaroyo a cuminsa cu e iniciativa di diferente instalacion di procesamento di sushi den e region pa construi un central moderno na Alkmaar, como solucion pa e problematica di contaminacion den aire cu e instalacionnan anterior tabata causa.

   HVC ta procesa un miyon ton di sushi pa aña: Segun Van der Vaart, HVC a desaroya den transcurso di aña for di un empresa principalmente enfoca riba procesamento di sushi, pa un empresa publico cu ta activo den diferente sector relaciona cu medio ambiente y energia sostenibel. Actualmente, HVC ta dedica su mes na coleccion y procesamento di sushi, recuperacion di materia prima, produccion di electricidad y calor, como tambe varios proyecto relaciona cu energia solar y di biento.

   HVC ta dispone di dos central di procesamento di sushi cu produccion di energia, uno na Alkmaar y otro na Dordrecht. Hunto, e dos instalacion ta procesa aproximadamente un miyon ton di sushi di cas pa aña.

   E sushi cu no por recicla ta wordo procesa den e centralnan, caminda e energia genera durante e proceso ta wordo probecha pa produccion di energia. Parti di e energia aki ta wordo distribui mediante e rednan di energia pa genera calor den cas y empresa den e region.

   Ademas di procesamento di sushi, HVC ta dedica atencion na recuperacion di e materialnan cu por wordo uza di nobo, cu e meta di limita e cantidad di sushi cu ta perde su balor como materia prima.

   Van der Vaart a splica tambe cu inversion den instalacion nobo y infrastructura di energia sostenibel eventualmente por rekeri sosten financiero mediante subsidio.

   Posibilidad di cooperacion cu Aruba: HVC eventualmente lo por contribui na solucion di e problematica di sushi na Aruba, Bonaire y Corsou. El a indica cu e delegacion di Aruba ta na Hulanda precisamente pa conoce e manera cu HVC ta organisa su actividadnan y investiga si e modelo por ofrece oportunidadnan pa nos islanan.

Un di e posibilidadnan cu por wordo examina ta e modelo di cooperacion cu HVC ta aplica, den cual diferente gemeente ta traha hunto pa organisa servicio di maneho di sushi y desaroya varios proyecto pa genera energia. Segun Van der Vaart, ainda mester investiga si e modelo aki y e actividadnan di HVC por wordo adapta na e realidad di Aruba y e otro islanan den nos region.

   E representante di HVC a confirma e importancia di comparti conocemento y experencia, mientras cu e posibilidad di un cooperacion concreto lo depende di mas investigacion y dialogo.

   E bishita na HVC a ofrece e delegacion di Aruba oportunidad pa conoce di cerca un sistema industrial cu ta combina maneho di sushi, tecnologia y energia sostenibel, den cuadro di e buskeda di solucion den maneho di sushi, un reto grandi cu e islanan ta enfrenta.