ORANJESTAD (AAN): Manera ta conoci, tabata na luna di Mei 2017 cu WEB Aruba NV hunto cu e compania Isotron, a start cu construccion di e proyecto di ‘Sunrise Solar Park’ na Lago Heights, cu ta instalacion di panelnan solar cu por produci 5.9 MW di electricidad.
E proyecto awendia ta funcionando y ta contribuyendo grandemente na e red di coriente cu ta suministra varios bario cu electricidad.
Awor e compania Isotron a sigui cu proyecto na otro paisnan, y a start cu ehecucion di nan prome proyecto na Guatemala cu construccion di un planta solar di 10 MW. Nuebe planta lo ta na tera, y uno lo ta riba dak.
E planta lo bay suministra coriente necesario pa actividad di un industria cu ta bin den Departamento di Zacapa, y lo bay drenta den servicio na fin di 2021.
Di e forma aki, e compania Isotron ta sigui haci proyectonan den Caribe y Centro America. Nan a traha riba proyectonan caba na El Salvador, Costa Rica, y Aruba.
Na El Salvador, e compania Isotron a ehecuta diesdos planta solar cu ta produci un total di 160 MW.
