Compagnie in de West di Defensa den Region Caribe ta haci transferencia di rotacion

ORANJESTAD (AAN): Den un ceremonia Militar cortico, e asina yama ‘Compangnie in de West Rotacion 36’ a pasa su tareanan over na e siguiente unidad, rotacion 37.

   Pa medio di e traspaso di tareanan tradicional, e Comandante nobo, esta Capitan Herman a haci transferensha cu su predesesor Capitan Joost. Rotacion 37 tambe ta keda cuater luna den Region Caribe. Compagnie in de West (CidW) ta un unidad permanente di Forzanan Real (Koninklijke Landmacht) den Region Caribe, cu por worde ubica den un variedad di tarea.

   E unidad cu ta bay, durante e ultimo lunanan, ademas di trein, tambe a desplega un cantidad di apoyo na autoridadnan local, e.o. na Curacao unda a yuda cu e centro di vacunacion na Base di Marina na Parera, caminda mas o menos 10.000 persona a risibi nan vacuna contra Covid-19, pero tambe pa sosten na Cuerpo Polisial di Curaçao (KPC) den mantenimento di medidanan di Coronavirus.

   E sosten na autoridadnan civil ta un di e tareanan primordial di Defensa den Region Caribe. Capitan Herman aki a bisa: “Nos ta anticipa e colaboracion entre Defensa den region Caribe y e diferente organisacionnan di Gobierno di e islanan/paisnan. Tambe pa e periodo di horcan e CidW nobo, hunto cu diferente otro unidadnan di Marina Real ta para cla, y lo bay un region si eynan un horcan a pasa y tin necesidad di yudanza eynan, semper y na momento cu ta riba peticion di autoridadnan local.”.

   CidW 37 ta procedente di e ‘13 Infanteriebataljon Regiment Stoottroepen Prins Bernard (RSPB)’-Regimento Batayon di Infanteria, trupanan di Asalto, un unidad di 11 Brigada Aeromobil. E trupa aki, Alpha “Madju” compagnie no ta uno desconosi den region. Na 2019 e tabatin tambe e tarea di ‘CLAS-compagnie’ den Region Caribe.

   Ta e intencion cu nan lo entrena durante e siguiente 4 lunanan na tanto Aruba, Bonaire como na Curaçao. Ambos unidad ta procedente di Assen y conose otro di e kazerne eynan.