ORANJESTAD (AAN): Tanto Hulanda y Republica Dominicana, a firma e siman aki un acuerdo cu cual nan a fiha e fronteranan maritimo entre ambos pais den Lama Caribe.
Un boletin emiti pa Ministerio de Exteriores di Republica Dominicana, e Ministro Roberto Alvarez y e Embahadora di Hulanda, Annemieke Verrijp, a establece “cu e delimitacion di tur e zonanan maritimo a wordo pinta a base di equidistancia y lo bay ta e liña geodisico forma pa e puntonan identifica pa nan coordinadonan geografico expresa den e sistema di referencia “World Geodetic System” di 1984.
Pa Republica Dominicana, e acuerdo aki ta representa ‘un logro’ den nan politica exterior ya cu e ta busca pa ‘harmoniza su legislacion cu ley internacional” y “e recursonan necesario pa e delimitacion di e limitenan maritimo Dominicano cu 4 otro pais cu ainda ta pendiente.”
Di otro banda, Embahadora Verrijp di Hulanda a comparti e boletin ey riba su Twitter account y a describi e acuerdo como uno ‘historico’ y ‘importante pa seguridad y desaroyo’.
“Lama semper tabata e vinculo di union entre nos paisnan, desde e interaccion Taino entre Hispaniola, Aruba, y Curacao,” el a agrega.
Republica Dominicana tin seis frontera maritimo, di cual dos a yega di wordo defini anteriormente, esta cu Colombia na 1978 y Venezuela na 1979. Awor na 2021, Hulanda y Republica Dominicana a bay di acuerdo riba nan limitacion maritimo.
