Como parti di agenda 2030 Profesionalizacion den enseñanza y tur sector ta un “must” pa tur hende

Anuesca Baly, directora SKOA:

• SKOA ta recoriendo e trayecto aki for di 2018 

ORANJESTAD (AAN) – Directoar di SKOA, señora Anuesca Baly, den entrevista cu Matutino DIARIO, a relata cu e caminda cu SKOA ta canando for di aña 2018, invirtiendo den su maestronan den e parti di profesionalizacion, a cuminza bao e directora anterior señora Daal y e prome Congreso di Enseñanza na mesun aña, y for di e tempo ey tur aña nan SKOA ta organiza su “Onderwijs Congress”.

  “Cada aña nos ta purba di haci’e mas grandi y aworaki cu ‘Education Week’ parti merdia, e muchanan no ta perde les pero e docentenan ta profesionaliza nan mes.

   “Nos ta haci’e pa motibo cu e ta un parti unda bo tin cu inverti den e ser humano, y den nos caso pa nos docentenan sigui profesionaliza nan mes, pa nan sa kico ta pasando den e mundo di educacion. Nan tin cu trece educacion y guia na nos alumnonan, pues, nos tin cu duna nan e tool aki como bon doño di trabao”, señora Baly a expresa.

“Esaki tambe ta un di e puntonan riba agenda 2030 unda cu profesionalizacion ta un must”, el a subraya.

Anuesca Baly a señala cu esaki no ta algo cu por bisa “No, nos ta haci’e mas”, pero practicamente tur organizacion na Aruba, sea cu e ta un NGO of un departamento di Gobierno, nan ta ocupa trahando riba proyectonan na unda unda cu profesionalizacion ta bira un ‘must’ pa tur hende.

“Nos no por keda atras. Tin hende cu a cuminza traha 5 aña pasa, a haci un estudio, a bin bek Aruba bin traha, pero locual el a studia 5 aña pasa, claro e tin e base pero e tin cu keda mehora. Tur parti di mundo, unda cu bo ta aworaki, tur hende cu ta trahando ta wordo profesionaliza door di nan doño di trabao. Bo no por keda bisa cu bo ta keda haci bo trabao manera bo ta haciendo e desde 20 of 30 aña pasa. Claro! Bo tin e base, pero digitalizacion a drenta, anto tur cos ta digital, y si bo ta trahando ainda cu pen y papel, na modo di bisa, of cu ‘type write’, e no ta bay mas. Nos tambe como SKOA ta keda boga cu nos ta kere den crecemento di nos docentenan, nos alumnonan, pero dunando nan e tools”, Anuesca Baly, directora di SKOA, a remarca.