Monique Giel-Labad, Tienermoeder na WGK:
ORANJESTAD (AAN): Monique Giel-Labad, Tienermoeder na WGK, den su entrevista cu Matutino DIARIO, a menciona cu tin diferente instancia cu su seccion, ta traha cu nan, pero e ta depende di e necesidad di e hoben of di e mayornan cu e ta referi nan na e instancia rekeri.
Durante charlanan, un tema cu ta bin dilanti di parti di e hobennan ta cu nan kier sa mas tocante infeccion. “Cu infeccion nan kiermen e malesa transmiti sexualmente, pasobra esey toch ainda ta un punto di atencion. Durante di e charla nos ta papia un tiki di dje, di locual cu nos ta topa den practica cerca muchanan cu a sali na estado, y cu a yega di pasa den malesa transmiti sexualmente.
E parti ey tabata tin hopi atencion di e muchanan, y nan tabata tin pregunta riba dje. Anto eynan tambe nos ta enfoca un poco riba dje”, Monique Giel a señala.
Ora un instancia ta tuma contacto cu WGK pa pon’e na haltura di un menor di edad cu ta na estado, nan ta tuma e caso y ta contact mayornan, y ta duna e mucha guia y informacion. No tur ora mayornan ta accesible, of tin ta bisa cu e mucha a scoge esey, y e tin cu para responsabel pa loke el a haci. Pues, hopi biaha e contacto cu mayornan den e casonan aki, ta basta dificil, segun Monique Giel-Labad a duna di conoce.
