ORANJESTAD(AAN): Dialuna mainta Jonel Duperrier Esperance di Asociacion di Haiti a papia cu Formador.
Despues di e reunion Esperance a bisa cu e ta contento y orguyoso di a ricibi un invitacion pa participa na e combersacionnan aki di Formador cu e stakeholders.
“Mi ta contento cu mi por a sinta cu Formador y papia entre otro riba e problemanan di e comunidad Haitiano na Aruba”.
Nos como Haitiano semper ta sinti cu Aruba ta nos cas y nos semper ta biba den harmonia cu e Arubianonan, segun Esperance, kende a indica cu e reunion a bay hopi bon.
El a bisa tambe cu e ta sigur cu Dios ta bay sigui bendiciona Aruba y e Gobierno aki.
Tambe e representante di Haiti a bisa cu Haitianonan semper ta dispuesto pa traha duro y cu pesey e ta spera cu esnan cu no ta legal ainda haci un esfuerzo pa bira legal.
Prensa a puntra Esperance kico por yuda den esaki y el a splica cu si economia cuminza draai bon y hopi compania tin mester di trahador, e Haitianonan tambe por haya companianan cu por firma pa nan haya permiso pa traha oficialmente riba nos isla.
El a indica cu constantemente e Haitianonan cu no tin nan documentonan na ordo ainda ta haci hopi esfuerzo y ta gasta placa pa purba haya nan permiso.
Nan no ta purbando di keda Aruba ilegalmente, sino nan kier haya nan permiso pa por traha debidamente pa Aruba.
