ORANJESTAD (AAN) – Den e contexto di formacion di gobierno nobo di Aruba, Formador Evelyn Wever-Croes a sigui reuni cu stakeholders; un di nan ta Stichting Schouwburg Cas di Cultura.
Vicky Arends, director, a elabora den conferencia di prensa relaciona cu e reunion, a informa pueblo con a bay cu e encuentro aki cu Formador y su Team.
Director di Cas di Cultura a relata cu e reunion a bay hopi bon, y e ta spera cu Formacion y e delegacion lo a compronde henter e proposito di Cas di Cultura, cu ainda ta den pleno preparacion, y a haci hopi trabao pa renova Aruba su Cas di Cultura.
El a subraya cu Cas di Cultura ta e unico Teatro proscenio na Aruba y den Caribe Hulandes. El a expresa cu e ta spera cu e proximo gobierno lo habri porta pa Cas di Cultura ricibi fondonan di Fondo Europeo, Merca, Lotto, etc., pa e fundacion yega na e fondonan necesario pa, por fin, Cas di Cultura por renova.
Vicky Arends a menciona cu locual cu e fundacion ta haci ta evita cu Cas di Cultura no bay atras mas, pero renovacion ta algo mas detaya y mas profundo. No solamente ta trata di renova, sino cu nan ta pensa riba e necesidadnan di comunidad, pa un Cas di Cultura mas amplio, cu diariamente por haci algo den dje.
Tambe ora di crea un lugar mester pensa riba explotacion tambe. Nan a hinca un plan den otro, y e indeling di e edificio lo cambia. “E lo no cambia hopi, pero di afo lo por mira cambionan moderno, pero tambe den e parti monumental meymey”, el a splica.
El a reitera cu nan tin e plan di renovacion completamente cla, y nan tin e suma defini. Dos aña pasa nan tabata tin un suma traha, pero ora Covid-19 a bin dal den porta, a pensa riba un plan mas chikito. A percura si, pa e funcionalidadnan extra cu e fundacion kier mantene den Cas di Cultura, pa e ta un sala diario pa henter comunidad.
