SANTIAGO DI CHILE: Tur hende sa cu ora bo come demasiado hopi caloria, of come fast-food hopi regularmente,
bebe hopi refresco cu sucu aden, y keda hopi tempo inactivo, ta costumbernan cu por contribui cu bo peso di curpa ta subi.
Pero tin otro factornan cu ta ponebo haya sobrepeso cu ta importante tambe, y cu ta relaciona cu bo estilo di bida y estado psicoemocional, esta ora bo no ta drumi suficiente, ta hiba un ritmo di bida acelera, y yen di stress, of no ta worry ora di come demasiado durante cierto periodo di dianan di fiesta den aña, of ora di bay cu vakantie.
E falta di regularidad den horario di come, den compania di personanan cu tambe ta descuidando nan alimentacion, tambe ta otro costumber of comportamento cu ta pone hende bira gordo, y esaki toch ta keda na abo pa coregi.
Pero tin un factor masha poco conoce cu ta pone hende haya sobrepeso y ta pasa sin cu bo ta ripara mes cerca hopi hende. Esey ta ora cu bo ta confundi ‘hamber’ cu ‘soño’. Esey ta advertencia di e nutricionista Fran Sabal.
Ora di lesa esaki pa prome biaha, e ta sonabo un tiki straño, pasobra e gana di come y di drumi ta parce di ta dos sensacion hopi diferente, pero e confusion perceptivo ta un fenomeno hopi mas frecuente cu hende ta kere, segun e experto aki a bisa.
Sabal tin un licencia di Nutricion y Dietetico di Universidad di Valparaiso na Chile, y ta experto den gestion emocional y Programacion Neurolinguistico (PNL). E ta autor di e buki ‘Nutrición emocional” lanza na 2020 y ta dirigi e Scol di Nutricion Emocional.
E mes ta papia di loke bo mester compronde di alimentacion di forma integral, ya cu “den nos curpa ta tur cos ta interrelaciona,” y ta considera e peso como e resultado di e interaccion di e cuatro nivelnan di loke bo ta: (1) Mental, (2) Emocional, (3) Nutricional, (4) Spiritual.
Drumi bon ta un clave: For di e perspectiva aki, soño tin un papel fundamental riba nos peso, pues ta vital pa bo haci uso di dje y drumi den e mihor forma posible, sino pasobra ademas e ta evita cu bo ta bay confundi esaki cu hamber, “loke ta ponebo come mas cuminda siendo cu den realidad loke bo mester e momento ey ta djis bay drumi mas y mihor,” Fran Sabal a bisa.
Pero ta con hende por confundi e necesidad di drumi y e gana di come? Nan parce dos sensacion full diferente. Toch hopi biaha ora di sintibo cansa, nos ta pensa cu nos tin hamber of cu nos tin di mester di cuminda pa haya mas energia, pero loke realmente nos mester ta decansa.
Pa e motibo ey tambe, tin momento den cual nos ta confundi e necesidad di soño cu un sensacion di hamber. Pesey semper e experto ta pidi hendenan pa nan come di un forma conciente.
Bo ta logra esey, por ehemplo prome cu come, ta ideal pa sinta, hala rosea na forma sosega pero profundo y conecta cu bo curpa y su sensacionnan, y puntra bo mes: Kico mi ta sinti aworaki? Di berdad mi tin hamber? E momento ey kizas lo yudabo check con bo oranan di drumi tabata ultimo temponan, con bo a bin ta descansando y cual ta e nivelnan di stress, pa asina bo sa si bo mester di berdad bay come e momento ey. Sorprendentemente ora bo haci e ehercicio ey di auto-observacion, hopi biaha bo ta bin ripara cu loke realmente bo tin no ta hamber, manera bo a kere.
Pero ta con hopi ora tin di drumi pa dia pa asina e falta di soño no afecta negativamente bo peso? E recomendacionnan general ta consisti pa drumi un promedio di ocho ora pa dia, pero esey ta bin ta depende di cada persona, ya cu algun ta drumi menos y ta sinti nan mes hopi bon. Pero otronan tin di keda drumi un poco mas.
Lo importante aki ta pa semper scucha bo curpa y compronde cu e resultadonan cu awe bo tin den bo bida pa cu bo preso, ta producto di hopi variable, no djis ta depende di e cantidad di ora cu bo ta drumi, ni exclusivamente di loke bo ta come, sino tambe ta depende di loke bo ta pensa, di loke bo ta sinti, y finalmente con bo ta escoge pa biba, dia pa dia.
Siesta lo yuda hopi of no: Hopi hende ta puntra si e siesta tipico despues di come lo por ta beneficioso of e ta malo pa bo peso di curpa? Djis corda cu siesta no ta reemplaza e soño nocturno, sino cu mas bien e tin metanan digestivo y e ta algo pa no desconseha. Bo no ta bay subi ni baha di peso pasobra bo ta dal un ‘nap’ chikito despues di come.
E importante pa sa aki ta cu e drumimento anochi ta loke ta drecha hopi asunto den bo bida, ora cu bo celnan di cuero ta regenera, tur sushi den bo cerebro ta wordo saca. E drumimento anochi ta loke ta wordo relaciona directamente cu bo sistema endocrino, pues e ta yuda cu bo sistema hormonal. Un siesta lo ta algo añadi na e costumber di drumi anochi, pues bo no por consider’e como un reemplazo si acaso bo no a descansa di berdad durante anochi.
