Como 80 studiante di Colegio Nigel Matthew preparando viahe pa Canada

ORANJESTAD (AAN): Siman pasa, Colegio Nigel Matthew na San Nicolas tabata anfitrion pa Jessica Hogue, di e intituto educacional ‘Ontario Tech’ pa di dos biaha.

   Su bishita tabata specialmente pa e 80 alumnonan di Colegio Nigel Matthew cu ta rumbo pa Canada riba Diaranson 3 di April venidero.  E ta forma parti di e proyecto di viahe cu yama “CNM goes to Canada 2024”.

   Alumnonan na scol a ricibi un monton di informacion y conseho pa nan proximo viahe.  Tambe nan a pasa pret ta creando e toren mas halto di sunchi (‘marshmallow’) y toothpicks.

   Ontario Tech University ta un universidad publico di investigacion ubica na Oshawa, na Ontario.  E campus principal di e universidad ta riba un teritorio di 160 hectare den parti nort di Oshawa, mientras nan tin un otro campus chikito den downtown Oshawa.

   Relaciona cu e viahe aki mes, DIARIO a nota cu Diabierna 15 di Maart 2024 lo bay tin un Feria Cultural na e scol, pa asina yuda recauda fondo pa e alumnonan.  Lo bay ta un actividad di 6:00 pm te cu 11:00 pm, cu e.o. Rincon Boys, Galloway, grupo di baile, poesia, canto, y tentnan di cuminda, artesania, cos dushi, weganan popular, y mas.  Lo bay tin un obra teatral yama ‘Greetings from Aruba’ tambe.