Como 70 meter di tubo di riolering a kibra den area di Eagle Beach

DOW haciendo reparacion mesora

ORANJESTAD (AAN): Desde 28 di October cu a pasa, DOW a cuminsa haya keho di awa sushi ta saliendo for di riolering den area di Eagle Beach.

   Daryl Lue, kende ta hoofd beheer infrastructuur pa DOW, a indica cu mesora nan a subi caya pa bay check kico ta pasando, y tambe a bay mira na e planta di RWZI na Bubali mes pa check e situacion eynan.  Na e planta tur cos tabata funcionando bon.  A bay check tambe si e pompnan cu tin den area ta funcionando, y tur tabata OK.

   E ora e team a sigui bay mas leu pa wak kico ta e problema.  A cuminsa habri tur tapadera (conoci como ‘manhole’) instala varios lugar, y aki den e area di La Cabana All Suite Beach Resort a bin ripara cu un banda e nivel den riolering ta halto, y otro banda e nivel ta abao.  Mirando cu esaki ya ta indicando algo straño, a sigui investiga.

   A dicidi na busca un Jetter y Vacuum Truck, y ora cu a pone presion y pusha esaki den e tuberia, na otro banda nan a keda sorprendi pa mira santo blanco ta saliendo.  Esey nifica cu e tubo bao tera, fabrica di material asbest, a kibra.

   Pa bypass e problema, DOW a core pone un Diesel-pomp temporal eynan, cu a cuminsa funciona bon.  Pero como cu e ta un pomp grandi, e ta cende y paga regularmente, y esaki dado momento ta pone e bateria baha completo.  Ora cu esey a socede, e Diesel-pomp no tin forma pa notifica cu e no por start mas.  Pesey awa sushi a cuminsa back-up den e resto di tuberia, y ta busca e lugar mas facil pa sali.  Y e lugar ey ta cerca di e Cocoloco Bar na Eagle, y despues sali tambe banda di Screaming Eagle poco mas panort.

   Tur eybanda pues a bay bao di awa sushi.  Mesora DOW a busca team pa haci full e area limpi, basha liquido special pa combati holor, haci limpi, y pone mas antiseptico pa mitiga riesgo pa e ser humano.

   Den cuadro di un siman, nan a haya nan ta cambia 3 biaha e bateria di started di e Diesel-pomp, y awor a haci cambio na esaki pa e traha un tiki mas eficiente.  E ta trahando un tiki mas largo, y no ta cende/paga mas regularmente mas.  Alternator awor ta haya chens di charge e bateria bek tambe.

   DOW sa cu e no ta un situacion agradable, pero ta monitor awor e situacion aki mas regularmente, incluyendo den oranan di marduga, pa asina fix mesora si acaso tin fayo atrobe.

   Full e tuberia na La Cabana ta uno hopi bieu, y tres aña pasa na 2020 como 70 meter di e tubo a kibra.  Den pasado tambe como 70 meter a kibra di dje.  Pues e tuberia semper den fin di November ta kibra.  Kizas ta pensa cu e cantidad di yobida, y posible subimento di lama riba tera cu ta pone presion riba santo blanco, ta eherce presion riba e tubonan.

   Ya caba a reemplaza e tubonan kibra pa evita cu e situacion banda di Cocoloco lo ripiti.  Plan tey pa sigui cambio di algun parti di tuberia tambe.