“Como 55 aña pasa mi bida a cambia pa semper” y tur esey debi na un solo cancion

MADRID: Tabata e fecha 17 di Juli 1968 cu e bida di Julio Iglesias a cambia y no a keda mescos. 

Su participacion den e Festival di Cancion di Benidorm a cambia su destino cu pa algun tempo tabata mustra di ta insigur.  Pasobra un anochi cu el a regresa di un fiesta di amigo, e vehiculo cu e tabata aden a bay dal contra algun palo di mata, fracturando un pia, y cabando asina cu su carera como futbolista profesional.

   E Diasabra ey, esta 22 di September 1962 e tabata yen di speranza pa cu su prometedor carera den mundo di futbol, ya cu el a hasta debuta cu e prome ekipo di Real Madrid.

   Seis aña despues, como 55 aña pasa, el a yega na e Festival cu su cancion “La vida siguie igual”, cu a gana prome lugar y asina un carera nobo a start, cual ainda awe na 2023 e ta luciendo cune.

   “Como 55 aña pasa mi bida a cambia pa semper, mi tabata studia ley, hunga futbol cu mi team faborito, pero un accident a frustra tur mi ilusionnan,” ta loke Julio Iglesias mes a relata Dialuna riba su mesun account di Instagram.

   Despues el a agrega: “Pero e accident ey manera semper mi ta bisa, a uni mi alma cu mi cabes y mi a cuminza biba un aventura cu ainda mi no a finalisa,” awor cu e tin 79 aña di edad.

   “La vida siguie igual”, ta un cancion cu e mes a skirbi, y ta loke e tabata pensa riba loke e tabata sinti e tempo aya despues di su operacion di pia.

   Riba e topico aki el a skirbi: “Mi a saca forzanan cu mi no tabatin cu musica, cu mi tabata haya cu un guitara y mi a skirbi e versonan chikito aki sin sa unda nan lo hibami of unda nan lo bay cuminza, y nan a termina na e Festival di Benidorm na 1968.”

   E artista a bisa cu danki na e Festival Nacional di Cancion aki, “tur cos a converti den un soño cu ta durando te cu awe, awor cu 55 aña a pasa, y cu a cambia mi bida pa semper.

   Julio Iglesias, kende den ultimo temponan a bin ta nota monton di rumor circulando pa cu e estado di su salud, a gradici tur su fanaticonan “pa dunami asina hopi forza pa biba.”

   E potret ey ta saca durante e Festival di Benidorm, y a tuma lugar net den luna di Juli, un luna den cual ultimo añanan a hasta trata meme di dje riba Internet, cu ta mustra cu Julio ta wordo considera como sinonimo di luna di Juli.