Como 30 mucha a participa na e campamento di innovacion di Futura

ORANJESTAD (AAN): Dialuna mainta a cuminsa e Innovation Camp organiza pa FUTURA. Prome Minister tabata presente na e apertura di e campamento.

   Desde cu a cuminsa goberna na 2017, Gabinete Wever-Croes I a pone innovacion ‘front and central’ den su maneho y a purba di tur forma pa nos muchanan bin den contacto cu kico ta innovacion. Hunto cu FUTURA, Gobierno a organiza diferente camp prome cu Covid pero lamentablemente durante Covid mester a stop.

   “Awe mi ta contento di mira cu e ekipo tremendo aki di FUTURA a logra toch pa pone un camp riba pia un biaha mas pa trece nos muchanan den e mundo di innovacion. Un total di 30 mucha a participa na e campamento di innovacion kendenan ta hopi contento y entusiasma pa siña cosnan nobo”, Prome Minister Evelyn Wever-Croes a duna di conoce.

   Den su discurso cortico na e evento, Prome Minister a expresa cu mundo ta cambiando hopi lihe y loke nos ta siñando nos muchanan awendia na scol no ta suficiente pa mayan nan ta ekipa como adulto. E trabao cu nan ta prepara pe pa mayan, ora nan tin cu haya trabao ta ful diferente y p’esey e programa agresivo di innovacion ta pa e muchanan por ta den contacto cu diferente cos, pa asina nan pensa riba cosnan diferente pa nan por ta exitoso den futuro.

   “E muchanan ta cu un siman di vakantie y nan ta pasando un momento hopi bon na e camp. Cosnan cu nan ta gusta cu ta tur loke tin di haber cu tablet, cu computer pero tambe otro cosnan interesante. Mi gradici y felicita e ekipo di FUTURA pa organiza e Innovation Camp aki. Danki special tambe na e mayornan pa confia nos cu boso yiunan y asina poco poco nos ta construi e fundeshi pa futuro di e muchanan aki”, Prome Minister a expresa