KINGSTON: Den fin di siman a tuma lugar e instalacion oficial di e 10 candidatanan cu ta competi pa certamen di Miss Universe Jamaica 2021.
Esaki a socede na AC Hotel Kingston, ora cu oficialmente den e ceremonia nan a ricibi nan sjerp, y di e forma ey oficialmente nan ta competi den e evento, di cual e anochi final lo ta dia 30 di October venidero.
E ta un evento hopi rapido pa Miss Universe Jamaica. E co-director di e evento, Mark McDermoth a informa publico un tiki di cada candidata, ora cu nan a cana den e trahe di baño oficial Cacdemode di Vietnam cu ta e patrocinador.
Algo cu a anuncia e anochi aki tambe ta cu e certamen ta transformando su mes den un “wellness weekend” cu e speranza di ehecuta tur actividad riba tereno di e Hotel aki mes.
Loke nan kiermeen cu “wellness” ta cu e certamen lo enfoca riba tres dia di fitness y actividad di salud cu e candidatanan y nan patrocinadornan. Asina lo dirigi riba e area di bienestar, specialmente awor durante e pandemia cu e salud di un hende, no djis fisico pero tambe mental, mester di mas atencion.
Tambe e candidatanan lo haya sesion di training y con pa cana riba pasarela, door di e actriz y preparador di pasarela, Lu Celiana Sierra. Dia 30 di October, e actual Miss Universe Jamaica 2020, esta Miqueal-Symone Williams lo bay corona su sucesor.
Riba e potret aki por mira e candidatanan, d.r.p.d. Kim-Marie Spence, Lauren Less, Kaydean Sterling, Jianna Thompson, Chavelle Kavanaugh, Keronica Lewis, Aaliyah Barnett, Daena Soares, Trudy-Ann Peart, y Trishani Weller.
