Commissie Corporate Governance ta presenta su raportahe final

Minister Ursell Arends:

Siguiente paso pa Corporate Governance: Implementacion! 

ORANJESTAD (AAN): Commissie Corporate Governance a entrega su raportahe final na Minister di Integridad y Minister di Asuntonan General durante un reunion dia 15 di februari 2024. E raportahe final, cu ta obtenibel riba Publico.aw, no ta trata solamente di e trabounan cu e Comision a realisa durante e ultimo 2.5 aña, pero tambe ta duna recomendacion pa e siguiente pasonan pa e trayecto di implementacion.

            E Comision a consisti di Sr. Jossy Laclé como presidente, sr. Fredis Refunjol. sr. mr. Arie Swaen y sra. dr. mr. Hellen van der Wal. E miembronan a wordo gradici pa e trabounan cu nan a ehecuta na un forma profesional. Aruba lo por conta e aña aki ainda cu un ley moderno di corporate governance, dirigi na gobierno y entidadnan den sector publico y semi-publico.

            Sr. Jossy Laclé a urgi pa priorisa e introduccion y implementacion di e ley: ‘Aruba ta en espera di esaki!’, el a declara den e prologo di e raportahe. Minister Arends a confirma cu a base di conseho di e Comision, e lo instala un ‘Implementatieteam’ cu lo traha hunto cu sector (semi-)publico pa realisa  e implementacion di e proposicion di ley y ehecucion di reglanan di good corporate governance.

            Commissie Corporate Governance a wordo instala na 2020 pa traha un Raamwerk Corporate Governance, cu ta dirigi riba aumento di e nivel di good corporate governance di entidadnan semi-gubernamental na un forma duradero. E raamwerk ta inclui entre otro un ontwerp-Landsverordening Corporate Governance, dirigi na gobierno, y un Code Corporate Governance, dirigi na entidadnan semi-gubernamental.

            Implementacion di e raamwerk cu e Comision a desaroya lo tin un impacto substancial, no solamente pa entidadnan den sector semi-publico, pero tambe pa e gabinete mes. Cu implementacion di e ley y reglanan di corporate governance, Aruba lo kibra un tradicion bieu door di traha formalmente cu vacatura, profiel di funcion y rekisitonan specifico ora di nombra director y miembro di hunta di comisario.

            E Comision a tende repetidamente cu esaki lo ta un reto pa Aruba. Den e prologo di e raportahe, sr. Jossy Laclé ta remarca cu conseho di minister completo a bay di acuerdo cu puntonan di salida di good corporate governance y a aproba e vision y conseho di e Comision. ‘Pa e Comision, e commitment aki tawata un rekisito crucial pa por a avansa e trabounan na un forma serio,’ segun sr. Laclé. ‘Awor ta necesario pa e Raamwerk realmente wordo implementa y pa tur esnan envolvi den corporate governance di entidadnan den sector publico y semi-publico – riba tur nivel –contribui na realisacion di e interesnan di e comunidad di Aruba na un forma eficiente, efectivo y eficas. Esey ta e meta final.’

            E raportahe final y mas documento ta obtenibel riba Publico.aw.