Bon noticia pa comunidad
ORANJESTAD (AAN): Siman ta finalisando cu un bon noticia pa esnan na Aruba cu tin meter di coriente prepago na nan cas of apartamento.
Esey ta cu tres stacion di gasolin a duna luz berde pa bolbe cuminsa bende coriente prepago.
Despues cu Aruba Gas Dealers Association (AGDA) a tuma e decision riba diabierna, 2 di februari 2024, pa stop cu e servicio di benta di coriente Prepaid sin notificacion previo na NV Elmar of su clientenan, gerencia di Elmar a busca activamente solucionnan pa su clientenan di SmartUp Prepaid.
Durante e proceso aki, NV Elmar a extende e orarionan di servicio di su sucursalnan te cu 8:00 pm, dunando oportunidad na su clientenan pa recarga nan cuenta. Ademas, clientenan di SmartUp Prepaid por tabata sigura cu e meter Prepaid a continua suministra coriente despues 8:00 pm, dunando asina e oportunidad pa recarga su siguiente mainta na un sucursal di Elmar.
Bende coriente bek: E compania NV Elmar riba Diabierna atardi laat a anuncia, cu nan ta contento di anuncia ta reanuda e servicio di benta di coriente Prepaid na Gasoline Station.
Despues di renegociacion cu AGDA, e servicio ta worde reanuda desde Diabierna ya caba na e siguiente Gasoline Station pa clientenan di NV Elmar cu ta prefera transaccion personal:
(*) Paradera.
(*) Palm Beach.
(*) Cura Cabay.
Desde awor, por cumpra coriente Prepaid solamente den e forma di pago efectivo na e pomp stacion menciona ariba.
Durante e periodo di transicion aki, mientras ta reanudando e servicio na tur Gasoline Station rond di Aruba, ELMAR su sucursal na Oranjestad lo habri awe Diasabra 17 di februari 2024, for di 8:00 am te cu 12:00 pm. Entrante Dialuna, 19 di februari 2024, e sucursalnan di ELMAR lo reanuda e horario di servicio na e horario normal.
NV Elmar ta keda comprometi pa ofrece su clientenan diferente opcion pa recarga nan meter Prepaid segun nan preferencia. Pa clientenan cu ta prefera transaccion personal uzando tarheta di banco, por bishita e sucursalnan di Elmar. Pa esnan cu ta prefera transaccion na forma efectivo, por bishita pomp stacion of sucursalnan. Y pa esnan cu ta prefera transaccion online, e app Pay.Aw ta disponibel.
Como 30% di cliente di SmartUp Prepaid ya ta uzando Pay.Aw pa recarga nan meter Prepaid y ta continua aumentando. Elmar kier sigui encurasha su clientenan cu ta prefera transaccion digital y cu ta dispone di un cuenta bancario, pa disfruta di e beneficio di compra via Pay.Aw, unda bo por Top Up unda cu ta y ki ora cu ta, tur dia, instantaneamente.
Pa tur Elmar su clientenan cu ta dispone di un meter manual (keypad) Prepaid, e compania lo sigui activamente reemplaza esakinan pa smart meter Prepaid, pa asina duna e clientenan aki tambe e oportunidad pa utiliza e Pay.Aw app.
Elmar kier expresa su gratitud na su clientenan di SmartUp Prepaid pa nan pasenshi y comprension durante e proceso aki. Nan ta keda comprometi pa sigui brinda servicio di coriente confiabel y conveniente na su clientenan.
