Accident fatal na Dubai
ORANJESTAD (AAN): Den fin di siman a drenta e informacion, cu un hoben procedente di Aruba a perde su bida tragicamente den un accident di trafico na Emiratonan Arabe Uni, esta e capital Dubai.
Ta trata aki di e hoben conoci como Bryon Richardson, kende ta e yiu homber mayor di e conocido ciudadano local, Plons Richardson.
Bryon a bira un persona hopi agil riba lama, danki na numeroso charter di piscamento abordo di e yate ‘Moonray’. Ademas di ta un excelente dek hand, e ta experto den pisca for di den boto, pero tambe bao superficie di lama, unda e ta tira pisca.
Mescos cu diferente otro Arubiano, e tambe a haya un contract recien pa bay Dubai, unda ta duna un man pa diferente Sheik pa ora di subi lama y bay tira pisca cu nan.
Siman pasa el a bay core cu un motorcycle di un amigo, y coriendo cu tiki velocidad halto, el a perde control riba e aparato, y haye den un accident basta grave. Bryon a fayece eynan mes.
Bryon Shaughn Richardson a nace dia 20 di Juni 1996, pues tin 28 aña di edad. Famia ta tumando decision con pa trece su restonan mortal pa Aruba pa e wordo dera aki.
Na famia di Bryon, esta e tata Plons, mama Ica, y ruman Kyle, DIARIO ta extende su mas profundo palabra di condolencia.
