Minister Ursell Arends a indica cu:
ORANJESTAD (AAN)—Minister di Medio Ambiente, señor Ursell Arends, a duna di conoce den un entrevista, cu Diahuebs cu a pasa, despues cu e departamentonan concerni (Comision) a bin hunto, a wordo palabra cu a bira momento pa envolve tambe KPA den e situacion di sushedad na Aruba.
El a splica cu e decreto ministerial (APV) den su maneho ta stipula sancionnan y multanan cu mester cay. Aunke esaki no ta e caminda cu gobierno kier yega, si ta asina cu ora ta cuminza boet e ciudadanonan ta bay bira mas conciente. El a subraya cu tin biaha ta e mesun nombernan ta keda bin dilanti, cu ta keda comete e tipo di actonan aki. Nan ta pensa cu un bez cu nan haya sancion nan ta bay siña nan les, tambe.
El a subraya cu den e campaña nacional cu ta bay tin nan kier logra pa tur compania cu tin baki di sushi, tambe participa den e campaña pasobra ta hunto nan tin cu haci’e. “Hunto nos tin cu zorg pa Aruba ta limpi, hunto tin cu bay crea e concientizacion cerca e ciudadanonan, y e companianan concerni ta brinda e servicio aki pa añanan caba, y nan ta conoce e materia aki caba. Nos ta conta cu nan participacion tambe”, Minister Ursell Arends a señala.
Un di e problemanan cu tin ta cu, lamentablemente, e companianan cu ta procesa sushi no ta habri diasabra, y riba esey a bin un peticion door di e comision, y e dialogo a cuminza cu e companianan wak si nan por habri den fin di siman, pasobra ta e dia cu e ciudadanonan ta haci nan cura limpi y si sikiera nan habri diasabra of diadomingo, nan lo trece un alivio grandi pa e comunidad di Aruba.
E dignatario a bisa tambe cu tin dialogo cu Serlimar, cu tambe ta forma parti di e campaña nacional aki, pa loke ta trata desperdicio, y e ta spera cu aki algun luna y sigur prome cu fin di aña, Serlimar lo haya espacio pa haci mas como compania. Dentro di poco e tin cu presenta na Corte atrobe, pa e companianan cu Serlimar debe, cuminza ricibi nan pago y haya esaki den su totalidad. E ora ey e mandatario ta spera cu e compania por ta hopi mas activo tambe, pa loke ta trata e bakinan den bario, pa stimula comunidadnan tambe pa tin lugarnan central den e ocho distritonan unda nan mester deposita nan desperdicio, y esaki tambe lo forma parti di e campaña nacional cu gobierno ta bay conduci, un bez cu vacacion escolar termina.
