Den cuadro di combersacionnan entre Crisis Team y SMAC: ---ORANJESTAD (AAN) – Sharline Koolman, Crisis Team Leider, a elabora den conferencia di prensa riba actualizacion di Covid-19, tocante e prueba QR (Code) y su uso den futuro cercano, cu DVG kier bin cu ne.
Koolman a reitera e palabranan di Minister di Salud, cu e consehonan di Crisis Team ta pa uza esaki como prueba cu e persona por drenta na eventonan masal.
El a bisa cu e combersacionnan cu Crisis Team tabata tin cu SMAC (Stichting Maneho di Aruba su Carnaval) den e caso aki, ta pa coordina esaki na e miho manera posible, y cu nan tur por siña di esaki y wak con ta miho, pa bay over na eventonan mas grandi.
Koolman a agrega cu, entre e eventonan cu SMAC ta encarga cu nan, DVG a pidi nan pa tin dos siman minimo entre cada evento, pasobra dos siman ta duna un bista si tin casonan cu a sali for di e evento ey.
Pues, teniendo cuenta cu dos siman cada bez, SMAC lo bin cu su proposicionnan tocante kico nan lo bin cune, como evento.
Sharline Koolman a menciona cu ambos instancia tin contacto regular y siman, Diabierna mes, nan tabata tin reunion y e contacto ta hopi bon. Crisis Team ta purba di guia nan miho posible, y nan tambe ta bin cu proposicionnan cu DVG ta willing pa scucha pasobra nan tambe kier move pa bay na e normalidad nobo. Si tin mester di bin cu mas protocol pa otro eventonan lo haci esaki, pero nan mester cuminza tuma lugar pa e proximo aña.
Koolman a agrega cu Salud Publico tin un Comision cu nan ta yama “National Commissie Test Beleid Covid-19”, cual, actualmente, ta deliberando riba e posibilidadnan pa introduci un maneho di e test, considerando un PCR test of antigen test, of haci uso di e QR Code test of di e vaccinatiebewijs como criterio pa drenta den e eventonan.
E dama a agrega cu e eventonan por ta di SMAC of actividadnan deportivo, cu tambe DVG kier stimula mas tanto posible.
Ademas, Sharline Koolman a informa cu otro siman, Minister di Salud Publico y Crisis Team, lo haya e conseho aki y cu nan por sigui delibera y termina esaki.
E funcionario tambe a recorda cu e vacuna ta disponible ainda, y cu e ciudadanonan cu no a vacuna ainda, por pasa na DVG y tuma esaki. El a referi na personanan di 12 aña di edad y mas.
