Arubahuis tabata anfitrion di reunion cu Ministerie van BZK --- ORANJESTAD (AAN): Informe di Den Haag ta indica cu recientemente a tuma lugar un reunion na Arubahuis entre
representantenan di Aruba, Curaçao, Sint Maarten y Ministerie van Binnenlandse Zaken en Koninkrijksrelaties (BZK) riba e topico di Burgerservicenummer (BSN) pa studiantenan di Caribe Hulandes. E meta di e reunion tabata pa intercambia di pensamento riba e topico y pa discuti riba posibel solucionnan pa mehora e proceso pa facilita tur studiante di Caribe Hulandes cu un BSN.
Pa varios aña caba e situacion di BSN pa studiantenan di Caribe Hulandes ta conduci na diferente reto practico ora nan bin establece nan mes na Hulanda. E representacion di e islanan ta purba continuamente pa yega na palabracionnan cu e diferente gemeentenan na Hulanda y cu Vereniging Nederlandse Gemeenten (VNG) pero a conclui cu e ta keda un reto structural cu mester atende tambe na nivel nacional.
E topico di BSN pa studiantenan di Caribe Hulandes a bolbe haya atencion y ta riba agenda politico desde cu Nationale Ombudsman di Hulanda a hiba un investigacion y a publica su rapport na fin di aña pasa unda cu ta acentua e retonan cu studiantenan di Caribe Hulandes ta confronta ora di bin studia na madre patria.
A base di esaki tabata tin varios pregunta di miembronan di Tweede Kamer y tambe debate politico riba e topico aki unda cu e mandatarionan responsabel a indica cu ta evaluando diferente scenario pa studiantenan di ambos islanan BES como pa studiantenan di e islanan autonomo den reino. Arubahuis conhuntamente cu e demas islanan y Nationale Ombudsman a tene varios reunion riba e topico cu Vereniging Nederlandse Gemeenten (VNG), Nederlandse Vereniging van Burgerzaken (NVVB) y cu Nuffic.
Tur persona naci y/of estableci na Hulanda of ciudadadonan cu tin di haber cu un instancia oficial na Hulanda mester dispone di un BSN pa atende cu asuntonan oficial cu ta rekeri identificacion. Hulanda tin varios aña haciendo uso di e systema aki pero e demas paisnan den reino no conoce e systema di BSN cu consecuencia cu cuidadadonan di e islanan no ta dispone di un BSN. E systema di BSN di Hulanda ta comparabel cu e systema di persoonsnummer of ID-nummer di Aruba unda cu ciudadanonan por identifica nan mes y regla asuntonan oficial cu instancianan competente.
Mas y mas asunto oficial ta rekeri un BSN y aki ta unda studiantenan di Caribe Hulandes na inicio di nan bida na Hulanda ta keda pega sin cu nan por establece nan mes oficialmente na Hulanda y regla nan asuntonan. Den caso cu un studiante tin vivienda unda cu e por registra su mes na Gemeente na yegada na Hulanda e por tarda un maximo di 4 siman pa ley pa por haya su BSN.
Den caso cu e studiante no tin vivienda na yegada na Hulanda e situacion ta bira hopi mas complica. Sin un BSN diferente asunto cu un studiante mester caba di regla y completa promer cu aña academico cuminsa ta keda pega. Esaki ta conta entre otro pa banco, financiamento di studio di DUO, OV-studentenreisproduct y pa activa DigiD.
Durante di e reunion e diferente representantenan a bolbe ilustra e retonan cu studiantenan di Caribe Hulandes ta enfrenta ora nan bin studia na Hulanda y a discuti riba posibel solucionnan pa asina por facilita e proceso di BSN na un manera mas optimal. Ministerie van BZK a duna un splicacion amplio riba e diferente scenario cu nan tin awo riba mesa cu por ta posibel solucionnan pa e situacion actual.
Ministerie van BZK a indica cu actualmente ta evaluando e diferente scenarionan pa asina propone e scenario cu ta miho realisabel y cu lo brinda un solucion real pa nos studiantenan. Den e proceso aki ta evaluando e rol di diferente instancianan oficial cu lo por facilita e BSN y riba e posibilidad pa facilita esaki prome cu studiantenan yega Hulanda.
E representanan di e islanan a indica di ta contento cu e iniciativanan di Ministerie van BZK y tin necesidad di haya mas informacion y tambe un miho bista riba e implicacionnan di cada scenario. E reunion tabata uno hopi constructivo y a palabra cu lo sigui traha hunto pa yega na solucionnan duradero pa nos studiantenan.
Minister Plenipotenciario Guillfred Besaril ta hopi contento cu e initiativa aki pa atende cu e problema aki pa asina yuda nos studiantenan na comienso di nan estudio, cual ta cuadra cu maneho di Arubahuis pa preparacion di nos studiantenan cu ta bin Hulanda.
E potretnan ta cortesia di Cas di Aruba.
