ORANJESTAD (AAN): A bin tuma nota cu Wardacosta di Caribe Hulandes ta bayendo cu e trend moderno.
Awendia tin hopi hende cu ya no ta yama telefon mas, y pesey e instancia aki cu ta encarga pa vigila costa di Aruba y demas islanan, tambe ta habri pa comunica via otro sistema.
Manera ta conoci, si bo ta mira riba lama of na oriya di lama, situacionnan sospechoso, ilegal, of algo di urgencia, bo por yama gratis e number 913.
Pero bo por manda message tambe na Whatsapp di +599 510-0913 y esey ta un bon noticia pa esnan cu ta prefera skirbi of manda voicenote.
E unidadnan di Wardacosta riba lama of den halto rond di awanan di Aruba, Curaçao, Bonaire, Saba, St. Eustatius, y St. Maarten ta cla pa yuda.
