Roly Sint Jago, Presidente Directiva di AFTA:
*Ta promove y vigila competencia husto y efectivo
ORANJESTAD (AAN) – Den conferencia di prensa, señor Roly Sint Jago, Presidente di Directiva di Aruba Fair Trade Authority (AFTA), a splica kende nan ta, y ki meta tin tras di e investigacion cu ta bay tuma lugar riba desaroyo di prijs di producto y competencia den e mercado.
Sint Jago a cuminza indicando cu prome cu e conferencia di prensa aki, señor Ponson di Comerciantenan Uni di Aruba (C.U.A) a expresa e preocupacion di empresarionan tocante e supuesto comportacion monopolista di SETAR NV, e empresa mayor di telecomunicacion na Aruba.
“Como reaccion riba esey, AFTA a emiti un comunicado di prensa dia 20 di Mei, anunciando cu nos ta bay tin un reunion cu SETAR NV, tumando den cuenta e señalnan tocante adkisicion di ITP Caribbean door di e compania aki. Dicho reunion a tuma lugar dia 5 di Juni ultimo.
E obhetivo di e conferencia di prensa aki, ta pa informa prensa den terminonan general, tocante e papel di Aruba Fair Trade Authority y e manera con nos ta bay realiza nos investigacionnan. Tambe lo tin oportunidad pa boso haci comunicacion; e ta esencial pa nos. Y nos kier ta sigur cu boso lo ta bon informa tocante e papel di AFTA”, Roly Sint Jago a expresa.
El a agrega cu di otro banda, e investigacionnan di AFTA ta confidencial, te na momento cu nan keda conclui formalmente. Esey ta despues di un proceso cuidadoso y coleccion di analisis di hecho y circumstancianan relevante di tur partido envolvi, y un proceso di audiencia y replica.
“Ta despues cu conclui e proceso aki Aruba Fair Trade Authority por saca conclusionnan y haci nan publico. AFTA ta e autoridad independiente di competencia di Aruba. Como un entidad administrativo, autonomo, cu personalidad huridico, esta un ZBO (Zelfstandige Bestuursorganen) nos ta promove y vigila competencia husto y efectivo na Aruba. Esaki ta nifica cu nos ta percura cu e competencia entre empresanan, no ta wordo obstrui, limita, of falsifica. Y cu e empresanan no ta abusa di nan posicion dominante”, señor Sint Jago a relata.
El a defini e tarea principal di AFTA como esun di supervisa e cumplimento cu e ordenanza di competencia, principalmente pa medio di supervision y aplicacion di e reglanan di competencia husto.
“Pa por realiza esaki nos ta conta cu instrumentonan efectivo di investigacion y aplicacion. Por ehemplo, nos por solicita informacion por escrito of oral, y realiza bishitanan na empresanan anuncia of no anuncia. Empresanan ta obliga pa coopera cu un investigacion di Aruba Fair Trade Authority”, señor Roly Sint Jago a señala.
aki.
