Comision di Flora y Fauna kier mas campañanan di concientisacion pa comunidad

ORANJESTAD (AAN):  Den cuadro di e reunionnan cu diferente stakeholder pa loke ta e proceso di Formacion di e gobierno nobo Gabinete Wever-Croes II, Formador a reuni cu Hilde Rodriguez-Taekema di Comision Flora y Fauna di Aruba.

E comision a haya chens pa compila nan preocupacionnan tocante naturalesa y medio ambiente. A traha algun documento cu algun aspecto cu nan ta preocupa cu ne y Prome Minister como Formador a acepta tur e documentonan. El a tuma nota di nan preocupacionnan hunto cu su team di coleganan cu tabata presente, a splica.

Rodriguez-Taekema a agrega cu nan ta spera cu e proximo cuater añanan por mira un mehoracion den proteccion di naturalesa y medio ambiente.

El a laga sa cu e preocupacionnan ta regarda na e concientisacion di comunidad tocante medio ambiente. Nan ta mira riba medionan social hopi hende ta cu ta aprecia naturalesa manera e ta.

Pero tambe tin un grupo grandi di publico cu no ta worry, pero tin otronan cu si ta preocupa cu proteccion di naturalesa, a remarca.

Tur cos ta importante y como publico mester ta mas conciente di e limitacion di naturalesa, a bisa.