Comision Celebracion Dianan Nacional ta anuncia Festivalnan di Dande 2024

ORANJESTAD (AAN): E aña aki un biaha mas, Comision Celebracion Dianan Nacional, hunto cu Ministerio di Cultura y UNOCA a

uni pa di tres biaha pa asina organisa e diferente eventonan rond di Festival di Dande, durante temporada di fin di aña y por sigui haci esaki uno mas grandi.

Lyonel Dirks, di Comision Celebracion Dianan Nacional a menciona cu e Festival di Dande 2024 ta programa pa tuma lugar riba dianan 27, 28 y 29 di December. Un total di 5 organisacion y 6 diferente proyecto di Dande.

Seguidamente, Ray Anne Hernandez, director di UNOCA, a hiba palabra y a indica cu esaki ta di 3 aña cu UNOCA ta cera un partnership cu Comision Celebracion Dianan Nacional, Departamento di Cultura y Ministerio di Cultura, pa asina por sigui engrandece loke ta nos dushi tradicion di Fin di Aña, cu ta nos Dande. Esaki ta algo sumamente importante, pasobra sin sosten financiero, e actividadnan no por tuma lugar y tampoco na e nivel cu pueblo ta exigi awendia. El a agrega cu tradicion di Dande ta asina importante y unico, cu ta super necesario pa e por sigui haya sosten financiero. E ta spera cu mas organisacion y companianan por sigui aporta pa sigui engrandece e tradicion di Dande na Aruba.

Raquel Lampe, vice presidente di Comision Chico Harms a bisa cu dia 27 di December, Fundacion Chico Harms ta organisa e fiesta di Dande, na Centro di Bario Brazil, cu ta di 55 aña cu esaki ta tuma lugar. Pa haci esaki un evento grandi, un total di 14 grupo lo participa riba e atardi aki, un antesala pa festival di Dande, cu lo tuma lugar diasabra 28 y diadomingo 29 di december. E atardi aki ta cuminsa pa 6:30 y pa solamente 2 florin pa entrada, e promenan cu yega lo haya un brindis. Lampe ta invita tur hende pa bin celebra hunto cu famia.

Festival di Dande Infantil y Hubenil lo tuma lugar diasabra 28 di december na Centro di Bario Tanki Leendert, cuminsando for di 6:30 di atardi, y inscripcion ta habri ainda, pero ta cera dia 26 di december y tiramento di lot lo tuma lugar riba mesun dia. E inscripcion ta completamente digital y mester bay na Facebook di Comision Promove Cultura.

E Festival Infantil y Hubenil ta consisti di 4 categoria, 4 pa 6 aña; 7 pa 9; 10 pa 12 y finalmente 13 pa 17 aña. Ta saca un ganador den cada categoria. E festival ta completamente gratis.

E aña aki ta e di 52 aña di Festival di Dande, cu lo tuma lugar dia 29 di december na Club Caiquetio. Nan lo cuminsa di 8'or di anochi. E aña aki, e organisadornan a haya sosten di Aruba Bank y a logra hisa e premionan pa e ganadornan. Despues di 20 aña e comision a logra hisa e premio. E prome premio ta 1.000 florin; di dos ta 500 florin y di tres premio ta 300 florin. Inscripcion ta habri y por haya e link Facebook page Fundacion Cultural Festivalnan Folklore. Entrada ta completamente gratis.

Luigi Rasmijn, presidente di Stichting Arugaldo, ta e organisador di 'Paradera, Ata un Dande pa Bo'. Esaki ta di cinco aña cu nan ta celebra e evento na rotonde di Paradera. Nan ta contento di por contribui na nos cultura y na nod Dande. E aña aki, e evento lo tuma lugar dia 29 di december na rotonde di Paradera pa 4'or di atardi te cu 9'or pa 10'or di anochi. Lo tin diferente cah'i orgel, gruponan folklorico y grupo di tambu. E ta invita tur musico pa participa libremente y ta pidi comunidad pa bin apoya y haci e evento uno unico. 

E  organisadornan ta extende un invitacion na comunidad completo pa bin presencia e actividad aki y tur festival.