Comisario di Polis a bira miembro Aruba Lions Club

ORANJESTAD (AAN): Aruba Lions Club a haya dos miembro nobo, y Lion Ivan Croes cu e aña aki ta wordo instala como e gobernador di e districto 35N cual Aruba ta pertenece,

ta esun cu a instala e dos miembronan nobo cu ta sr. Kenneth Croes cu ta un hoben comerciante manehando e compania LCR Technical Services cu sigur cu e curazon pa yuda den trabounan boluntario.  Un otro persona cu tambe a keda instala ta Ramon Arnhem kende no ta desconoci y ta den e funcion di Alto Comisario di Polis.

   Comisario Arnhem tambe ta un persona dinamico cu apenas algun tempo na Aruba a mustra e interes pa integra na un manera servicial den comunidad y den un tempo cortico ya por comunica den nos idioma papiamento y sigur kier contribui den su tempo liber pa por haci trabounan boluntario pa comunidad.

   Den presencia di e presidente actual di Aruba Lions Club, Lion Rubin Ponson cu alavez ta e persona cu a introduci e dos miembronan nobo aki, nan a haya un caluroso bon bini di tur e miembronan presente den e ceremonia cu a tuma lugar na Boulevard Events Aruba.