Colombia ta acepta back pashentnan di Aruba vacuna of no vacuna

Minister Dangui Oduber a confirma na DIARIO: --- Tin acuerdo cu ImSan ta duna sosten na HOH den caso necesario

ORANJESTAD (AAN): E tabata un noticia cu a spanta hopi experto medico di tanto Aruba, Curaçao, Bonaire, y tambe St. Maarten.  E paisnan aki ta usando profesionalnan medico na Colombia pa manda e pashentnan di mas grave pa tur tipo di problema di salud.

   Pero diripiente, Cancilleria di Colombia a bay di acuerdo, y a pone decreto cu desde 14 di December 2021, tur stranhero cu kier drenta e pais sea via lama, tera, of aire, mester ta vacuna completo contra Covid-19.

   Esaki a pone alarma bati mesora tambe na Aruba, pasobra e ta pone un brake inespera riba e proceso cu normalmente ta cana den caso di emergencia riba e isla, esta cu ta manda pashent pa Colombia.  Pero si acaso e pashent no ta vacuna, e ora e no por bay mas eynan!  Y casi no tin otro opcion pa manda pashentnan pa otro pais pa cuido avanza.

   Sinembargo, awor Minister di Salud y Turismo, Dangui Oduber a laga sa den e conferencia di prensa di Crisis Team y Gobierno, cu tin un acuerdo di cooperacion cu ImSan (Instituto Medico San Nicolas) pa tuma over algun di e pashentnan cu no ta worde trata pa Covid-19.

   ImSan tin 22 cama cu lo por pone disponibel pa Hospital si esey ta necesari. Oduber a splica.

   Banda di esaki, por manda pashentnan pa Colombia bek tambe. E siman aki a ricibi e confirmacion cu Colombia ta acepta tur pashent atrobe.

   Dos siman pasa, Colombia a tuma e decision cu nan ta acepta solamente pashentnan cu ta vacuna.

   Despues di negociacionnan entre Hospital di Aruba y diferente hospital cu cual tin acuerdo na Colombia, a yega na e palabracion cu nan lo acepta tur pashent. Kiermen, vacuna of no vacuna, Minister Dangui Oduber a duna di conoce.