Pasobra e pakinan ta parecido na Trululu
BOGOTA: Pa di dos biaha, autoridadnan maximo di e Superintendencia di Industria y Comercio (SIC) na Colombia, a impone medidanan severo contra e fabricante Comestibles Aldor, despues cu nan a yega na e conclusion, cu e pakinan di nan mangelnan tipo gummy cu yama ‘Trolli’, ta confundi clientenan pasobra nan ta parce hopi e mangelnan di marca ‘Trululu’, cu ta wordo fabrica pa e compania Super de Alimentos.
Pesey SIC a duna ordo pa Aldor saca mesora tur producto Trolli di mercado, y esaki ta encera Trolli Pulpo Morgan, Trolli Oink Splash, Trolli Ana y Conda, Trolli Mordiscos, Trolli Bananas, y Trolli Emociones. Tambe e compania tin di bay kita tur material di propaganda poni riba borchi, den poster, of riba social media cu ta promove e productonan ey.
Gobierno Colombiano a duna e compania un lapso di 10 dia pa cumpli cu e exigencianan aki, y a mustra cu e compania tin di evita di bay ofrece, distribui, bende, regala, of promociona e productonan aki di awor en adelante.
Tabata na comienzo di 2021 caba cu SIC a duna ordo pa stop esaki, pero segun Super de Alimentos, nan tabatin prueba cu Aldor a sigui bende nan gummy Trolli hasta un luna despues di e deadline di 10 di Mei 2021.
Despues di esey, e compania a cambia e pakinan di e gummy Trolli, pero segun SIC cu a atende e caso, esey no tabata suficiente pa mustra un diferencia compara cu e diseño di Trululu.
Awor cu e compania a haya su di 2ndo advertencia di SIC, tin di bay mira ki mas medida e instancia lo bay tuma contra e compania.
