ORANJESTAD (AAN) – Den cas di Cultura a tuma lugar un exhibicion titula 'Tropico Cube' door di Laura de Vogel.
Laura a dicidi di presenta parti di su investigacion artistico den e uso di espacio pa presenta arte. Asina e curator Ana Maria Hernandez a duna di conoce den un entrevista cu DIARIO.
Laura de Vogel tambe a hiba palabra, y a expresa cu e ta un artista di sol y el a menciona cu el a wordo invita door di Cas di Cultura pa haci un “solo show”.
Di e tempo ey el a cuminza pensa kico e lo haci den e espacio aki, cu ta basta grandi pa haci un exhibicion cu solamente su obranan, ya cu e tin cu a yena full e espacio.
El a comenta cu e ta hopi interesa den haci cambio y intervencion den espacio, y haci preguntanan pa su mes “kico cierto espacionan kiermen”. Asina el a cuminza wak ki materialnan e kier a uza cu ta support e concepto aki. El a traha cu tela, imagennan cu ta wordo uza pa bende t-shirt pa turistanan y e ta bezig ta investiga kico e espacio ideal lo ta pa un lugar manera Aruba of den Caribe.
El a cuminza investiga desde 2016. Como ehemplo, el a bisa cu el a pensa riba un espacio traha di cadushi, of uno traha di santo blanco cu ta algo unico na Aruba y locual ta su identidad.
E exposicion aki lo keda habri te dia 12 di Juli, di Dialuna pa Diasabra entre 10 or di mainta cu 4 or di atardi, pero cu reservacion cu por haci via telefon. Scolnan por acerca nan pa regla un tour. Lo tin un guide tour Diamars otro siman, atardi di 2.30 or pa 6’or.
Publico ta wordo invita cordialmente pa bin ser conoci cu e exhibicion 'Tropico Cube'.
