ORANJESTAD (AAN): Como parti di e campaña 3C-TRECE y riba Dia Internacional di Archivo, famia Genser,
den presencia di Minister di Finansa y Cultura Xiomara Maduro, a haci traspaso di un coleccion historico pa archiva na nos Archivo Nacional.
Ta trata aki di un coleccion di mas cu 2000 slides (dia’s positieven) di famia Genser. E potretnan aki a wordo saca dor di e fotografo Fritz Genser y ta duna un bista amplio di Aruba den e periodo 1949-1972. E potretnan ta duna un bista di e famia Genser y amigonan y di e bida familiar aki na Aruba den e periodo ariba menciona.
Aparte di e coleccion di slides, e ta inclui tambe hopi potret di Aruba su carnaval den e periodo aki. Hunto cu e potretnan saca door di sr. Fritz Genser, cual coleccion ta bay haya e nomber “Fotocollectie Fritz Genser”, Archivo Nacional Aruba a haya un coleccion di e revista di deporte “The Local” cual tabata scirbi na e idioma ingles. E revista aki tabata relata exclusivamente tocante deporte na Aruba den e periodo di 1949-1962. Adicionalmente, famia Genser a traspasa 91 ehemplar di Esso News.
E gesto di Famia Genser pa trece nan material historico, ta un coleccion di hopi balor pa nos archivo nacional. Archivo Nacional Aruba y Minister di Finansa y Cultura Xiomara Maduro, ta gradici famia Genser pa nan contribucion na nos Archivo Nacional y ta pidi pueblo di Aruba pa uni su mes na e campaña 3C-TRECE material historico pa Archivo Nacional Aruba pa asina nos por Colecta-Conoce-Conserva nos historia.
