Colombia a confisca casi 3.500 vin di tribon cu tabata wordo manda pa Hong Kong

BOGOTA: Autoridadnan Colombiano cu ta check cargamento na Aeropuerto El Dorado, a bin intercepta y

confisca un carga ilegal di 3.493 vin di tribon, y 117 kilo di zwemblaas di pisca cu tabata wordo exporta na forma di contrabando pa Hong Kong.  E material aki tabata empaketa den diez bulto cu tabata bay wordo manda como Courier Transport.

   Segun e entidad, e cargamento di vin aki (conoci como ‘fin’ of ‘aletas’) a wordo manda originalmente do Roldanillo na Valle del Cauca, via truck te na Bogota.  E persona cu a manda nan, a declara na e compania di Transporte cu tin solamente zwemblaas di pisca aden.  Pero ora cu a bin check e carga, a topa cu otro tipo di pisca aden, y esaki a pone cu nan a alerta autoridad.

   Pa por extrae asina hopi vin di tribon, ta calcula cu nan a sacrifica entre 900 pa 1.000 tribon di diferente specie, di cual nan tamaño por ta entre 1 y 5 meter di largura.

   Unavez bo corta e vin di un tribon, e animal no por landa mas y ta muri algun rato despues.

   Awor Departamento di Dijin di Colombia ta determina pa sa ki specie di tribon a wordo sacrifica.  Autoridadnan forensico, y tambe di Interpol a wordo yama pa yuda den e investigacion.

   A descubri cu e doño di e carga tabatin permiso di handle pisca te cu 2020, pues esey ya a caduca.  Ademas e permiso ey ta djis pa bende y transporta pisca den Colombia, y no pa probecha di recursonan hidrobiologico (manera tribon), ni tampoco e ta un permiso pa exporta.

   Costumber Asiatico ta cu sopi di vin di tribon ta hopi valioso den e cultura pa centenares di aña, pues e ta un delicadeza raro cu tabata wordo comi antes solamente door di hendenan mas rico durante ocasionnan special, pues e ta algo manera un simbolo di status.