'Climate Action Aruba' cu mensahe di concientisacion riba e problematica di cambio climatico

ORANJESTAD (AAN): Na Aruba tambe tin un grupo di personanan cu ta forma parti di 'Climate Action Aruba' y cu ta activo den loke ta e concientisacion riba  cambio climatico cu ta afectando cada dia mas mundo henter.

Diabierna atardi, nan a tene un manifestacion dilanti di Bestuurkantoor  unda pa medio di posternan y panfletanan nan a trece nan  mensahenan dilanti.

Loke nan ta desea ta pa e gobierno nobo duna mas atencion na e problema global aki cu tambe ta afecta Aruba.

Nan ta invita comunidad di Aruba pa subi nan Facebook Page pa asina firma un carta di peticion na gobierno pa actua mas lihe posibel contra e cambio climatico.

Por a mira cu dilanti di Bestuurkantoor a pone algun sapato den rij. Segun Anita Mijts-Aerts, organisacion di Climate Action Aruba, e sapatonan aki tabata representa esnan cu no por a haci acto di presencia of cu pa motibo di Covid-19 no por a asisti.

Na total, 98 persona a participa den e evento aki. E peticion na gobierno lo ta disponibel 6 siman mas pa asina esnan cu kier a duna nan firma digital, hacie ainda. Despues e peticion lo wordo entrega na gobierno.