Colegio Arubano ta e unico cu a nenga su Alumnonan di examen un chens crucial cu Minister a otorga

Alumnonan sintiendo nan mes defrauda pa Rectorado

ORANJESTAD (AAN): E siman aki DIARIO a worde poni na altura, cu casi tur examenkandidaat pa tanto HAVO y VWO na Colegio Arubano ta den hopi desanimo y no djis pa un decision cu Rectorado a tuma, sino cu nan ta sinti defrauda cu Rector a laga nan cay manera un patia berde!  Siendo cu e alumnonan aki apenas na luna di Januari cu a pasa nan a uni fuertemente tras di Rector ora cu esaki a worde suspendi na un forma cu nan ta haya inhusto.

   Y esaki ta e danki cu e studiantenan ta haya awor!  Y nan tur ta keda babuca y no por compronde pakico Colegio Arubano tin cu haci e proceso pa e alumnonan asina dificil.  “Na Januari, ainda ora e alumno- y mayornan a protesta y para tras di Rectorado, awor nan ta hayando un backstab.”

   Limitacion pa HERkansing: Tabata dia 9 di Februari cu Minister di Eseñansa a manda un carta pa tur schoolbestuur di MAVO, HAVO, VWO caminda a otorga e peticion pa duna e muchanan den examenklas un extra chens di haci Her (“herkansingsmogelijkheid”) mirando tur concequencianan di Covid-19.

   Cu excepcion di Colegio Arubano, tur otro scol di MAVO, HAVO y VWO (DPS, SKOA, SPCOA, SAA y Stichting Onderwijs Combina) na Aruba a honra esaki y a duna nan alumnonan un extra Her.  DIARIO a haya sa cu Colegio Nigel Matthew (San Nicolas) a te hasta ofrece su alumnonan 2 extra Her.

   E decicion aki a worde tuma door di Schoolleiding y e Docentenraad, mientras si lesa e Landbesluit Eindexamen artikel 21a, ta para “de verantwoordelijkheid en het besluit voor een extra herkansingmogelijkheid ligt bij het bevoegd gezag en niet bij de schoolleiding.
   E bevoegd gezag ta SVOA, pero a tuma e decicion sin cu SVOA tabata na altura.

   Compara cu tur e otro scolnan, e periodo di herkansing pa SE-1 cu SE-2 na Colegio Arubano ta te despues di SE-3. Esaki ta significa cu e herkansingen mester ta cla y traha caba pa e herkansingsperiode cu ta bin. Pues e unico trabao cu lo bin acerca ta e coregimento di e herkansingen, pero esaki ta den e beneficio di e muchanan.

   Matutino DIARIO ta corda cu na 2021 si, pues e aña escolar anterior si Colegio Arubano a ofrece su alumnonan den examenklas e oportunidad aki.

   Net esnan cu a sufri mas:  Mientras cu ta e alumnonan di e aña escolar aki ta esnan cu a sufri mas di e concecuencianan di Covid-19. Debi cu e alumnonan di e aña ecolar aki a haya les online mas largo den nan voorexamenklassen (HAVO3 cu HAVO4 y VWO4 cu VWO5), caminda ya caba ta cuminsa cu e materia di examen pa (HAVO5 y VWO6). Pues nan ta drenta nan examenklas cu un restraso mas grandi!

   Asina por ehempel den VWO-4, tin vak no a logra pa finaliza tur cos door di e lesnan online. Esaki a worde hala pa VWO-5, cu concecuencia cu e material di VWO-5 cu nan no a caba a worde hala pa VWO-6.  Pues nan ta drenta VWO-6 cu un retraso mas grandi (por ehempel wiskunde-B).

   Si wak e herkansingsrooster di aña pasa lo mester dos dia so extra pa duna e muchanan e oportunidad aki.  Rectorado y Docentenan di Colegio Arubano a bin cu e excusa cu “esaki ta causa perdida di les”.  Serio?  Pero ora nan a welga 3 dia na Januari durante SE-week pa baha e bestuur di SVOA, e ora si nan no a mira e lesnan como un prioridad. E interes di e muchanan no a worde tuma den consideracion.

   Excusa fofo di scol:  Ademas di esey, a haya sa cu casi tur e vaknan, cu excepcion di e idiomanan ta cla caba cu e materia di examen, pues ta djis practica e alumnonan tin di haci awor pa e Examen, y esey ta algo cu e studiantenan por haci independiente.

   Despues cu Colegio Arubano a worde acerca door di entro otro mayornan, a bay haci un investigacion con malo e extra herkansing di aña escolar pasa a worde traha, pa proba pakico e alumnonan di e aña escolar aki no merece un extra oportunidad.  Lubidando cu esaki ta 2022, nan ta otro studiantenan compara cu aña pasa!!!  Ademas e ta bay pa e oportunidad cu ta worde brinda y cu cada mucha cu si logra subi su cifra, ta un alumno mas cu a logra!

   Y pa un investigacion den enseñansa ta confiabel lo mester investiga por lo menos 3 aña ecolar tras di otro!

   E herkansingen pa SE-1 ta cuminsa Diahuebs y Diabierna, Dialuna ta sigui cu herkansingen pa SE-2. Claro e tempo ta corto, pero kisas nan por haci mescos cu hopi school na Aruba a haci y ofrece tur mucha un oportunidad extra pa SE-2, den e siman cu ta bin.

   Sigur hopi mucha cu lo mester di esaki lo tuma esaki man habri. Asina por brinda tur mucha di Aruba e mes un oportunidad.

   Ta parce cu hopi a lubida tambe riba Articulo 3 di e Tratado pa Derecho di Mucha:  “Artikel 3 van het kinderrechtenverdrag, die gaat over het belang van het kind. Het stelt dat bij alle maatregelen betreffende kinderen, het belang van het kind altijd in alle beslissingen een eerste overweging moet vormen.”